Noma kunjani soze ngiqashe uDaubermann
MHLELI: Ngisho kuthiwa umuntu wakithi uboshelwe ukuchama emgwaqweni ngeke ngimthathele lo mmeli onguPeter Daubermann.
Intokazi yakoGagashe yamkhipha umoya waphelelwa ushatini yize ayenza yonke imizamo yokuyihluthula inhliziyo ukuze icikeke igcine ingasayiphenduli imibuzo yakhe.
Uthe uma ebona ukuthi ingane kaNondaba inzima wajikela eJajini ethi malehle esihlalweni sokusingatha leli cala.
Uthi uyagadla kanti izinduku zakhe zomile zavele zephuka kwazise ubegadla kumuntu osemkhakheni onjengowakhe.
Ngingamncoma ngento eyodwa umfo kaDaubermann, usesisikile isihlangu azovika ngaso ku-Omotoso uma kwenzeka elahlwa ngisho elilodwa lalolu hide lwamacala abhekene nawo.
Ijaji uma limkhalima ebuza umbuzo oyimfeketho wokuthi isitho sangasese sikammangalelwa sangena kangakanani kwesikammangali uyatetema ukhala ngokuthi ijaji lichema nommangali.
Ngicabanga ukuthi ummeli ohloniphekile uyazi ukuthi njengoba ingane kaNondaba yayineminyaka eyishumi nane kwenzeka lesi sisgameko, ngokomthetho waseNingizimu Afrika, yayingakafiki esigabeni sokuqonda ngocansi, ngakho-ke umthetho uyithatha njengengane.
Ngiyahluleka ukuqonda inhlosongqangi yemibuzo yommeli. Angiqondi noma ummangalelwa uthi walala nommangali bevumelene noma uthi akazange alale nhlobo naye ummangali.
Ephuzwini lokuthi ijaji lifisele ummangali inhlanhla njengoba ebeyobhala angiqondi ukuthi yini eyinkinga lapho.
Ummangali ubeyobhala izivivinyo ezingahlangene nobufakazi abethula enkantolo.
Abameli abahloniphekile nabahluzekile abawaziyo umsebenzi wabo bayabafisela ofakazi inhlanhla ekubhaleni kwabo izivivinyo uma icala lihlehla ngoba ufakazi eyobhala.
Yingakho ngibona sengathi le nsizwa yakoDaubermann beyimane izisikela isihlangu nje ngalesi sicelo esifakile futhi ngikholwa ukuthi beyazi kahle kamhlophe ukuthi ijaji lizosichitha.
Mayelana nokungafiki kwabamangalelwa enkantolo ngenxa yokuthi bayasatshiswa akusho ukuthi icala sekumele lingaqhubeki ngaleso sizathu.
Ngikholwa ukuthi ummeli ubanikile iseluleko sokuthi bayovula icala lokusatshiswa emaphoyiseni ukuze kuqalwe uphenyo. Uma bebona ukuthi abaphephile acele kuhoxiswe ibheyili yabo bagqunywe ezitokisini kuze kuphele icala.