Kuvulwe isikhungo esidle R5.5m KwaHlabisa
KUZOPHELA ukuhlupheka ezinganeni eziyizintandane nezivela emindenini edonsa kanzima, emuva kokuba uNgqongqoshe wezokuThuthukiswa koMphakathi KwaZulu-Natal evule isikhungo KwaHlabisa, ngoLwesibili. Lesi sikhungo esibizwa ngeNibela Community Centre esidle uR5.5 million. Sivulwe uNkk Weziwe Thusi, saxhaswa nayibhange laseGermany.
Isikhungo sizolawulwa yinhlangano ezimele iVukuzakhe Intergrated Home/Community Based Care exhaswe umnyango ngoR1 million kulo nyaka wezimali.
Isikhungo sizosiza umphakathi kumawadi amahlanu angaphansi koMkhanyakude, okuyisifunda obesidonsa kanzima ngenxa yokungabi nayo indawo esiza izintandane nemindeni ehlwempu.
Okhulumela umnyango uNkk Ncumisa Ndelu uthe ngeke kuhlale muntu kulesi sikhungo kodwa umphakathi uzosizakala ngokusivakashela uma udinga usizo.
“Izingane ezidinga usizo ikakhulukazi eziyizintandane, zizofika zisizakale ngezidingo zazo nangokudla. Kuzosizakala nezingane eziphuma emindenini entulayo ukuze zilekelelwe ngazo zonke izidingo,” echaza.
Mayelana nokuhlomuliswa kwabanegciwane lengculazi, uNkk Ndelu uthe kwesinye isikhathi abanalesi sifo bashiywa bodwa emakhaya banganakekelwa kahle. Ukuba khona kwalesi sikhungo kuzokwenza ukuthi babhekeleleke ngokuthi kuthunyelwe abazobasiza kusona, bathole nokudla ngendlela efanele.
Evula isikhungo ungqongqoshe uthe uMkhanyakude ubalwa nezifunda ezimbili ezintula kakhulu kuleli. Uthe kunesibalo esikhulu sabantu abangasebenzi, amakhaya aphethwe ngabesifazane nesibalo esiphezulu sezingane ezingafundi.
“Le ndawo ingezinye ezihlaselwe izinkinga ezibhekene nenhlalakahle yomphakathi. Yingakho kubalulekile ukuthi sisebenze kanzima ukulwa nalezi zimo eziphazamisa inhlalakahle. Kuyajabulisa ukubona intshisekelo yomphakathi nokubambisana ngokuvulwa kwalesi sikhungo, okubuyisa ithemba lokuthi kuzosizakala abaningi,” kusho ungqongqoshe.
Uthe kulesi sikhungo kuzoba nosonhlalakahle nomunye osebenza nentsha ukuze asize ezinhlelweni zokunciphisa izinga lokukhulelwa nokuhlaselwa igciwane lengculazi. Kuzosizwa nentsha evela emindenini entulayo kulesi sikhungo.
Ukuvulwa kwalesi sikhungo kuhambisana nomkhankaso walo mnyango wokuletha izidingo zenhlalakahle emphakathini.
Ezinye izikhungo ezifana nalesi zivulwe eNdwedwe (KwaDukuza), eBergville (Ukhahlamba), eCharlestown (AmaJuba), eMpendle (Harry Gwala) nasoLundi (Zululand).