Umbango wepulazi usungenwe uSomlomo
UQALA phansi umbango wepulazi elibangwa umakoti nabasemzini abalibuyiselwa uhulumeni eDundee njengoba udaba selungenwe uSomlomo waseNdumeni, oselufaka enkantolo ngoba esola lo makoti nesigungu sakhe ngokumkhwabanisela ngaleli pulazi.
Lokhu kulandela ukuthi uNkk Bongiwe Mbatha -Makhathini ethinte uNkk Nompumelelo maMthethwa Ntsele emazisa ukuthi ubafaka enkantolo ngoba bathathe incwadi yakhe yomshado neyokufa komyeni wakhe bafaka omunye umuntu ohlwini labahlomule kulo mhlaba naleli pulazi ngaphandle kwemvume yakhe.
“USomlomo uthukuthele kabi ngalento abamenze yona ngoba bamgilile bathatha incwadi yakhe yomshado, umazisi nesitifiketi sokushona komyeni wakhe uMbongeleni Edgar Makhathini bayokusebenzisa ukufaka ilungu lomndeni wakwaMakhathini ekubeni uSomlomo engazi. Ukhala ngokuthi benze sengathi bayofaka yena ohlwini lwesigungu sesikhwama saleli pulazi ukuze avale isikhala somyeni wakhe ongasekho. Kunalokho bavele bafaka ilungu lo mndeni wakwaMakhathini nokuyinto ayibona inenkohlakalo nokumxhopha njengoba esebafaka kubameli. Okunye akhala ngakho ukuthi sebeguqule igama ebelaziwa ngokuthi amaLinda Community Trust manje sebethi Abalondolozi,” kusho umthombo ocele ukungadalulwa.
UNkk MaMthethwa Ntsele uthe uselutholile ucingo lukaSomlomo lumazisa ngabammeli kodwa akanendaba ngoba bona akukho okubi abakwenza.
“Ngithe kulungile ayize leyo ncwadi kodwa nathi uma ifika sizoyidlulisela phambili kuMaster of High Court ophethe izinto zethu. Thina akukho okubi esikwenzile kodwa sacela umndeni wakwaMakhathini ukuba usinikeze umuntu ozovala isikhala sikaMakhathini . Basinikeza indodana yakhe nangempela sayemukela futhi akukho mininingwane kaSomlomo esayithatha ” kusho uNkk MaMthethwa Ntsele.
Uthe igama le trust balishintshe ngamabomu ngoba umndeni wakwaNtsele ubusubukela phansi abantu bezinye izibongo usuzitshela ukuthi ipulazi elawo wodwa yikho sebethi Abalondolozi Community Trust.
UNkk Mbatha-Makhathini ethintwa kusuka ngoMsombuluko uthe usemhlanganweni, wabhalelwa umyalezo umcacisela ngodaba ukuze aphendule kodwa wangaphendula. Ufoneliwe ebusuku ngawo uMsombuluko wathi usekomunye umhlangano ucela ukuthintwa ngoLwesibili ekuseni.
Esefonelwa ucingo lukhale lwaze lwazithulela ngemuva kwalokho wavele waluvala lwangabe lusangena.