USolinas noMicho abayingeni ekaRulani
ABAQEQESHI bezinkunzi zaseSoweto, iKaizer Chiefs ne-Orlando Pirates, bayikhombe kwabezindaba inkulumo kaRulani Mokwena obegxeka ubuthakathaka bebhentshi laMakhosi kusukela kuhambe uSteve Komphela ePhefeni.
UMokwena ugxekwe yiningi ngenkulumo yakhe yangoLwesibili lapho ethe kusukela kuhambe uKomphela kuyabonakala ukuthi sebuyashoda ubuholi nokuthi abadlali abaphambili abasayiniswe yiChiefs bayakugqiba ukwentula ulwazi kwabaqeqeshi bayo.
Le nkulumo ihlukanise phakathi abathandi bebhola kwazise abanye bathi bekungafanele akhulume ngalolu hlobo. Kukhona abathi uMokwena uqinisile futhi lokho kuzocaca ezinyangeni ezimbalwa ezizayo.
Izolo, esithangamini nabezindaba emahhovisi ePremier Soccer League uGiovanni Solinas weChiefs noMilutin “Micho” Sredojevic, bebemanqika ukuphawula, bagcina beyikhomba kwabezindaba.
“Angikwazi ukuphawula ngale nto. Uzakwethu nguMicho. Uziphatha ngendlela eyamukelekile njengami. Ngiyamhlonipha uzakwethu. Ngizizwa kahle, akukho okushintshile ngenxa yale nkulumo. Anginandaba nale nto. Sidinga ukugxilisa imiqondo yethu emaqhingeni omdlalo esizowudlala kunale nto. Angimazi uRulani kodwa kungenzeka ukuthi izintatheli ziyakhile le nto. Kuyamangaza, akujwayelekile ukuthi umqeqeshi akhulume ngale ndlela. Mhlampe izintatheli ziyiphekile le ndaba,” kusho uSolinas. IChiefs izogadulisana ne-Orlando Pirates emdlalweni wabakhaya we-Absa Premiership ozoba seFNB Stadium, eNasrec, ngoMgqibelo ngo-3.30 ntambama. Amakhosi agcina ukwehlula eZimnyama koweligi ngo-2014.
Kukhona abakholwa wukuthi uMokwena uzama ukuqeda uzinzo ekhempini yeChiefs ngaphambi komdlalo omkhulu. Kulaba kukhona nokaputeni weChiefs, u-Itumeleng Khune.
UMicho uthe kungenzeka ukuthi izintatheli aziyibekanga kahle inkulumo kaMokwena.
“URulani sisondelene kakhulu naye, sibambe umsebenzi owodwa. Sikhuluma naye zonke izinsuku. Ngibona ukuthi inkulumo yakhe ayibekwanga ngendlela futhi angifuni ukusho okungaphezu kwalokho. Ngifisa ukugxila emdlalweni esizowudlala ngoMgqibelo,” kusho uSredojevic.
IChiefs nePirates bazobhekana kowabakhaya ihlandla lika-164 emlandweni webhola laseMzansi. USolinas kuzobe kungokokuqala ebhekana nePirates kusukela eqashwe njengomqeqeshi waMakhosi ekuqaleni kwesizini ka-2018/2019. UMicho ubehola eZimnyama ngesikhathi zihlula Amakhosi ngo 3-1 ngesizini edlule kusaqeqesha uKomphela.
“Umdlalo wabakhaya mkhulu kakhulu. Kunzima ukubhekana nePirates kodwa sizokwenza konke okusemandleni. Abadlali bayazi ukuthi uchaza ukuthini umdlalo wala maqembu. Kodwa lona umdlalo webhola, kufanele sihloniphane. Ngiyayihlonipha iPirates,” kusho uSolinas.
“Umlando awusho lutho ebholeni. Ibhola liyimanje nekusasa. Kuzoba wumdlalo onzima kithina nakwiPirates. Kodwa mina ngifuna ukuwuthokozela lo mdlalo. Ngethemba ukuthi ngeke lube khona udlame, sihloniphane. IChiefs izame ukuwina nePirates izame ukuwina kodwa kuhlonishwane.” UMicho uthe” :Siyayihlonipha iChiefs. Njengoba usihlalo wethu (Irvin Khoza) ehlala esho ukuthi silawula ukujabula kwabantu kuleli lizwe. Amandla amakhulu esibusiswe ngawo ukuba lapha nokubajabulisa, kufanele siwasebenzise ngendlela ngoMgqibelo. Sibheke ukwenza konke okusemandleni, sithole imiphumela.”