Kuthinteke noD’banj ngokufa kukaHHP
UKUDLULA emhlabeni kwengwazi ye-hip hop uJabulani “HHP” Tsambo kuthinte nabangaphandle kwemingcele yaseNingizimu Afrika njengoba isilomo somculi waseNigeria, uD’banj, sithe siphatheke kabi ngalezi zindaba.
UHHP ushone ngoLwesithathu olwedlule. Imbangela yokufa kwakhe ibingakadalulwa. Phambilini wake waphumela obala ngokuphathwa wukhwantalala futhi wazama nokuzibulala izikhawu ezintathu.
Engxoxweni ekhethekile neSolezwe, uD’banj, ufanise uHHP nomfowabo.
“Sasiqokwe ndawonye kumaMTV Europe Awards okuqala ngo-2007. Saya eGermany ndawonye. Wayekhululekile, ephansi. Ngiphatheke kabi ngokwenzekile. Sengathi uNkulunkulu angawuqinisa umndeni,” kusho uD’banj ngomoya ophansi.
Laba bobabili babeqhathwe emunxeni weBest African Act noChameleone, Jua Cali, Samini noJuma Nature. Indondo yagcine ithathwe wuD’banj.
Ngokwesitatimende somndeni, uHHP uzofihlwa ngoMgqibelo eMmabatho, eMahikeng.
Kusasa kuzoba nenkonzo yesikhumbuzo eNewtown Music Factory, eGoli, ngo12 emini. NgoLwesine kuzoba nenye eMmabatho Convention Centre ngo-12 emini.
Umndeni ubonge kakhulu ukwesekwa nothando olutholayo.
Uthe abazobhonga emswaneni bavumelekile ukuya emkhulekweni wansukuzonke okubo kwalo mculi eMahikeng ngo-6 ntambama.
UD’banj ubuye waveza uthando analo ngeNingizimu Afrika, ikakhulukazi iTheku.
“Okokuqala isimo sezulu sipholile. isimo sezulu sipholile. Akushisi kakhulu futhi akubandi kakhulu, kukahle. Kucishe kufane naseNigeria. Ngibuya ngiphindelela eThekwini ngoba yilapho esijwayele ukwenza khona amaMTV Awards futhi sengibuye lapha kane noma kahlanu. Abantu banomusa futhi banothando. Uma ungazi uyabona lapha ukuthi abesifazane babalulekile. AbaseThekwini naseNingizimu Afrika banamafiga omnyovu, bahle kakhulu.”
Uthe unengoma azoyikhipha ngoNovemba 2 ayenze noCassper Nyovest.