Kusolwa utshwala kubhubha abafundi
IZIKOLE zaseMsinga ngaphansi kwesifunda uMzinyathi zigubuzelwe yifu elimnyama kushona abafundi abane ezigamekweni ezehlukene zezingozi zomgwaqo.
Abafundi abane bashone ezingozini ezimbili ezehlukene ngoMgqibelo. Kusolwa ukuthi abanye abashayeli abathinteka kulezi zingozi bebephuzilie.
Kushone abafundi ababili baseZwelinjani Secondary nababili baseFabeni Primary.
Engozini yaseZwelinjani Secondary kusolwa ukuthi bekushayela uthisha obekhothile, kweyaseFabeni kusolwa umshayeli weloli elishayisene netekisi ebithwele abafundi ukuthi ubebukhile.
Ingozi yokuqala yenzeke emgwaqweni eHholwane, lapho kushone khona abafundi baseZwelinjani High oneminyaka engu16 noneminyaka engu-19.
Laba bafundi kuthiwa bebevela emidlalweni yezikole ezihlukene behamba ngemoto kathisha iVW Polo ngesikhathi igingqika ngo-6 ntambama sebeya emakhaya.
Ngokombiko otholwe yiSolezwe ongakaqinisekiswa amaphoyisa, kusolwa ukuthi uthisha ubephuzile eshayela imoto ngesivinini esiphezulu ngesikhathi kwenzeka ingozi.
Uthisha kuthiwa uphume emotweni wabaleka.
Abanye abafundi abalimele engozini baphuthunyiswe ezibhedlela.
Abafundi baseFabeni kuthiwa bebephuma eThekwini bekade beyongcebeleka ngesikhathi itekisi abebehamba ngayo ishayisana neloli.
Iloli kuthiwa beliphambana netekisi, lavele lasuka emzileni walo laqonda ngqo etekisini.
Umthombo weSolezwe ongathandanga ukudalulwa uthi umshayeli weloli ubehluleka ngisho ukuma ngenxa yophuzo oludakayo, lokhu akuzange kuqinisekiswe amaphoyisa.
Engozini kushone abafundi bakaGrade 3, uThabo Duma no-Asenele Dlamini.
Okhulumela amaphoyisa KwaZulu-Natal uColonel Thembeka Mbele uthe kuvulwe amacala amane okubulala ngokungenhloso.
“Ingozi yeVW Polo kushone abafundi ababili kuyo emuva kokuba igingqikile, umshayeli asikamazi ngoba ubalekile endaweni yesigameko. Amaphoyisa aseMsinga aphenya icala lokubulala ngokungenhloso. Kwenye ingozi eyenzeke ngo-8:30 kushone abafundi ababili oneminyaka eyisishiyagalolunye nona-10. Itekisi abebehamba ngayo ishayisane neloli emgwaqweni waseDundee. Abanye abafundi bayiswe ezibhedlela. Amaphoyisa aseGreytown aphenya icala lokubulala ngokungenhloso,” kusho uCol Mbele.
Khona manjalo ngoLwesihlanu kushone umfundi esikoleni esingaphansi kwesifunda uMzinyathi ePro Nobis eDundee.
UMalwande Mavundla (14) kuthiwa ubedlala ibhola lezinyawo kade kunemidlalo esikoleni sakhe ngesikhathi evele ewa phansi. Uphuthunyiswe esibhedlela esiseduze, washona efika khona.
Okhulumela uMnyango wezeMfundo KwaZulu-Natal uMnuz Muzi Mahlambi uthe bagqemeke ingozi ngokushona kwalaba bafundi.
“Sitholile ngalezi zingozi ezimbili nesigameko sokushona komfundi kudlalwa. Sidumele kakhulu ngalezi zigameko. Sidlulisa namazwi enduduzo emindenini yabashonile,” kusho uMahlambi.