Kuboshwe 2 ngokusha kwenkantolo
BAKHALELWE ngamasongo kaSigonyela abesilisa ababili abasolwa ukuthi babehamba phambili ngesikhathi kushiswa inkantolo yenkosi eNgonyameni yakwaCele ngesikhathi kunombhikisho womphakathi onodlame ngenyanga edlule.
Inkantolo yenkosi uVukani Cele iVumengazi yathungelwa ngomlilo kanti kusolwa ukuthi yathungelwa ngababhikishi ababekhala ngokushoda kwamanzi kule ndawo okuthiwa sekuphele iminyaka ewu10 kwenzeka.
Kuze kube manje asikakatholakali isisombululo. Umphakathi umile ekutheni uzoqhubeka nokumasha uvale imigwaqo uma ungakalutholi usuku oluqondile amanzi azophuma ngawo kompompi abasemagcekeni.
Sekubanjwe imihlangano eminingi phakathi kukamasipala nomphakathi emizameni yokuxazulula lolu daba kube nhlanga zimuka nomoya.
Lo mbhikisho waqala ngenyanga edlule ulokhu uqhubeka izikhawu.
Okhulumela amaphoyisa kulesi sifundazwe, uCol Thembeka Mbele, uthe kuboshwe abesilisa ababili oneminyaka ewu-28 noneminyaka ewu-30. Bazovela eNkantolo yeMantshi yaseMlaza namhlanje.
Uthe abasolwa baboshelwe icala lokushisa nelokucekela phansi impahla kahulumeni.
Kuthiwa kungenzeka bethweswe namanye amacala angahlangene nale mibhikisho. Ngemuva kokushiswa kwenkantolo yenkosi kushiswe nehholo lomphakathi.
Sekuboshwe abantu abangu-14 selokhu kuqale lo mbhikisho.
Amaphoyisa athi kusazoboshwa inqwaba yababandakanyeka ekucekelweni phansi kwempahla kahulumeni okuhambisana nalo mbhikisho.