Unengwe abaqola ngegama likaButhelezi
UYAVUTHA uNgqongqoshe wezokuBusa ngokuBambisana neziNdaba zoMdabu KwaZuluNatal uNkk Nomusa Dube-Ncube “ngamaqola” asefuna ukudla imali ngegama lomholi we-IFP uDkt Mangosuthu Buthelezi.
Izolo uNkk Dube-Ncube ukhiphe isitatimende ezwakalisa intukuthelo ngomcimbi wokugubha iminyaka engu-90 kwazalwa uButhelezi ozoba ngoNovemba 10 enkundleni yezemidlalo iPrince Mangosuthu Buthelezi oLundi.
Okucasule ungqongqoshe wukuthi abahleli bomcimbi basebenzisa igama lomnyango wakhe ngaphandle kokuwazisa ukuze bathole imali yokuxhasa umcimbi komasipala.
“Sikhuza ibhadi ngalo mcimbi futhi asiwazi. Akekho oke weza kithina ezosibikela ngawo. Yikho kusethusa ukubona kusetshenziswa uphawu lomnyango ezikhangisweni zomcimbi. Lokhu kubi ngoba kulimaza igama likaButhelezi. Siyakujabulela ukubona abantu bakithi bebungaza iqhawe elineminyaka engu-90 lazalwa kodwa asisoze sivume ukubona osomathuba namasela besebenzisa igama lakhe ukuzinothisa bona,” kusho uNkk Dube-Ncube.
Imizamo yokuthola abahleli bomcimbi ukuze baziphendulele ngokusebenzisa uphawu lomnyango ngaphandle kwemvume yawo ayiphumelelanga.
Lo mcimbi kuthiwa uyingxenye yochungechunge lwemicimbi yokubungaza uButhelezi.
IMeya kaMasipala wasoLundi, uMnuz Wilson Ntshangase, ithe awukho umcimbi ohlelwe umkhandlu wabo wokubungaza uButhelezi ozoba ngosuku okukhulunywa ngalo.
“Umkhandlu into oyaziyo ukuthi kunabantu abahlele umcimbi. Abawenzi egameni likamasipala kodwa bafika kithina bacela ukuqasha inkundla yethu,” kusho uNtshangase.