Umkhuleko wemboni yamatekisi
UNGQONGQOSHE wezokuThutha nokuPhepha koMphakathi KwaZuluNatal, uMnuz Mxolisi Kaunda, ugqugquzele osomatekisi ukuthi baqhubeke nokusebenzisana noMnyango wakhe ukuthola izixazululo ezinkingeni ezibhekene nemboni yabo.
UKaunda ubekhuluma emcimbini obuseLadysmith wokukhulekela ukuthi kube nokuthula embonini yamatekisi nokuthi kwehle nezingozi zomgwaqo ezithinta amatekisi.
UKaunda uthe uhlelo lomkhuleko lumqoka ngoba luqinisa ukubambisana phakathi kwemboni yokuthutha umphakathi nohulumeni.
“Uma sikhuluma ngokuthula embonini yamatekisi siyazi ukuthi indawo yalapha eMnambithi nasoThukela jikelele bekufanele ngempela sikhethe yona ukuletha lo mkhuleko. Kuningi osekwenzekile kule minyakana nje embalwa edlule. Siyajabula ngokuthi izinhlelo zikahulumeni ngokubambisana nobuholi beSantaco ziyaqhubeka nokuletha uzinzo kule ndawo,” kusho uKaunda.
Uthe baqoka umxazululi ozimele ozobhekana nodaba lososeshini uSizwe neKlipriver.
“Kuyimanje uyaqhubeka nokusebenza umxazululi. Besimnike isikhathi esiyinyanga kodwa ngenxa yesimo sodaba mhlawumbe kuzokwenzeka sithi ukuselula,” kusho uKaunda.
Uthe kuningi abakwenzayo ukuthuthukisa imboni yamatekisi abale kukho ukuvula amahhovisi ePRE eThekwini nokuxoxisana mayelana nokuphazanyiswa kwamabhasi okwenziwa yimboni yamatekisi ePinetown.
“Siyalubheka udaba lokusebenza kukasoseshini waseZinqoleni naseMandeni njengoba kukhona izikhalo esike sazithola kwamanye amalungu. Sesikhiphe ama-operating licence awu-1404, awu-1023 sisawasebenza bese kuthi awu-12 ahoxiswa. Sisabheke abangu-2772 ukuba bafake izicelo,” kusho uKaunda.
USihlalo weSantaco KwaZuluNatal, uMnuz Boy Zondi ugqugquzele osomatekisi ukuba bawuhloniphe umsebenzi wabo futhi basebenze ngokuzikhandla ukuqinisekisa ukuthi kunozinzo embonini nezimoto zabo zisesimeni esifanele ukuthutha umphakathi.