Imeya ibhoboke ngokusatshiswa
IMEYA yoMkhandlu weTheku uNkk Zandile Gumede iphumele obala yathi kukhona abayisabisa ngokuthi bazoyibulala.
Ekhuluma enkonzweni yomngcwabo wekhansela uMnuz Sibusiso “Bhabhane” Maphumulo, obulewe ngeledlule, uNkk Gumede uthe kuneSMS ayitholile emsabisayo.
“I-SMS ithi wena nalezi zinkabi zakho siyakubuka futhi siyakulandela,” uNkk Gumede eyisho ngamafuphi ingqikithi yeSMS.
Uthe yena akazi lutho ngendaba yezinkabi.
UNkk Gumede utshele uNgqongqoshe wamaPhoyisa kuleli, uMnuz Bheki Cele obekhona emngcwabeni kaMaphumulo, ukuthi bacela ukuvikelwa bengamakhansela.
“Amakhansela asenkingeni ayabulawa kuthiwa akhipha amathenda. Kuyekwa abantu okuyibona ngempela abakhipha amathenda, izikhulu zomasipala. Namanje uMaphumulo ubulawa nje bekuthiwa udle uR5 million, okuyinto engekho,” kusho uNkk Gumede.
Ethintwa uNkk Gumede mayelana nokusatshiswa, uthe ubengakakwazi ukuvula icala ngoba usuke waba matasa kulandela ukushona kwamakhansela amabili kamasipala.
“Ngibuye phesheya kwezilwandle kwase kuvela izifo ezimbili emkhandlwini. Ikhona iSMS engisabisayo ngizoya kovula icala emaphoyiseni,” kusho uNkk Gumede.
UNgqongqoshe wezokuBusa ngokuBambisana nezoMdabu kuleli uDkt Zweli Mkhize uthe kuyacaca ukuthi kukhona inkinga ngoba amakhansela akumele abe yizitha nemiphakathi.
“Lapha KwaZulu-Natal kuphela bangaphezu kuka-620 abaqaphi abagada amakhansela okuyisibalo esiphezulu,” kusho uMkhize.
Uthe amakhansela akumele abe yizitha nemiphakathi ngoba asuke ekhethwe iyona.
Ethula inkulumo yakhe emngcwabeni, uCele uthembise ukuthi ngeke lize liphele isonto bengaboshiwe abantu ababulele uMaphumulo. Ngicela nisinike nje imizuzwana sizobabamba khona maduze abantu ababulele ikhansela ngoba ngeke kuze kubulawe izinyane lemvubu kucwebe iziziba,” kusho uCele.
Uveze ukuthi umphenyi wecala lokubulawa kukaMaphumulo, usatshiswa ngokuthi uzobulawa.
“Iphoyisa eliphenya leli cala sesizoligada ngoba kukhona asebelicathamela,” kusho uCele.
Uthe uzovusa namacala akade enzeka kodwa obekungakaboshwa muntu ngawo.
“Sesisungule ithimba elizobhekana nalawo macala, anjengawoMnuz Sbu Sibiya noMnuz Wiseman Mshibe. Sizowavusa ngoba sifuna ukuthi yonke imindeni eyabulawela izihlobo, yazi ukuthi zabulawa ngobani futhi kwakwenzenjani,” kusho uCele.
Umfowabo kamufi, uMnuz Siyabonga Maphumulo ukhale ngeANC wathi bayiboleka umfowabo ukuthi ayisebenzele kanti ekugcineni uzobulawa.