Lishone selilabile ifa lalo iphoyisa ebelingcwatshwa
BESE lilabile ifa lalo iphoyisa elibulawe lingaphandle komuzi walo KwaNdengezi ngeledlule.
Lokhu kuvele emngcwabeni walo obusenkundleni yezemidlalo KwaNdengezi izolo.
UWarrant Officer Bhekisigcino Zethembe Khwela (54) unconywe umphathi wakhe ngokuhlela impilo yakhe nathe ifa lakhe bese elabile.
Umphathi siteshi obekusebenza kuso uKhwela eMariannhill, uColonel Mdumiseni Nene, uthe abazange babe nenkinga ngezinto ezithinta umufi ngoba ubehlele konke.
“Wenze umsebenzi wethu njengabaphathi bakhe waba lula ngoba ubeklame zonke izinto zakhe. Ubhale phansi ukuthi ubani uzotholani, ukuthi unkosikazi wakhe uzotholani nezingane zakhe zonke wazibala. Ukuklame konke okwakhe. Lokhu sikushayela ihlombe ngoba sike sibe nenkinga kwesinye isikhathi umuntu ahambe engazihlelelanga. Abaningi kumele bafunde kuyena ngalokhu akwenzile,” kusho uNene.
Uthe umufi ube yiphoyisa kusukela ngo-1990 waze washona esawenza lo msebenzi.
“Uhlaselwa ngoLwesibili nje ngoLwesihlanu besihlezi nabakwandabazabantu sikhuluma udaba lwakhe ngoba ubesecele ukukhululwa esiteshini saseMariannhill esefisa ukusebenza eHillcrest. Bese ngisayine konke ngimvumela ukuba ahambe,” kusho uNene.
Izolo emngcwabeni kaKhwela abomndeni baveze ukuthi kuze kube yimanje abayazi imbangela yokubulawa kwakhe.
Udadewabo, uNkk Koto Mkhize, uthe umfowabo ubewuthanda kakhulu umndeni futhi bekunguyena obewuhlanganisa.
“Sishayeke kakhulu ngokubulawa komfowethu ngoba ubeyikho konke. Ubesithanda ngendlela emangalisayo, kusilimaze kakhulu ukubulawa kwakhe ngoba ubeyinsizwa umfowethu,” kusho uNkk Mkhize.
Izikhulumi ngokushintshana kwazo zincome umufi ngokuba nothando olumangalisayo ezinganeni zakhe nasemphakathini abephila kuwona.
Kuze kube yimanje akekho oseboshiwe ngokubulawa kukaKhwela. Uphenyo lwamaphoyisa lusaqhubeka. Kulo mngcwabo kugcwale itende abantu baze bama ngaphandle kanti namaphoyisa abephumile ezophelezela uzakwabo.