Izeluleko ngezifundo emcimbini wabafundi
UKUKHETHA izifundo ezihambisana nomkhakha owuthandayo emabangeni aphezulu kuhlahla indlela yomkhakha ozothathwa umfundi.
Lokhu kushiwo uMnuz Mthokozisi Ndlovu ongumxhumanisi womphakathi nesikhungo sezemfundo iSwinton College ngoMgqibelo emcimbini wokufisela abafundi bamabanga aphansi abahlala ehostela eWema ukuthi babhale kahle.
UNdlovu uthe kubalulekile ukuthi abafundi bazi ukuthi bafisa ukuthatha muphi umkhakha besemazingeni aphansi ukuze kuthi uma kufika leso sikhathi babe sebekulungele.
“Umkhakha owukhethayo kumele wazi ukuthi uzokuvulela amathuba angakanani, uzokwazi yini ukuthola umsebenzi uma usuqede ukufunda,” kusho uNdlovu.
UMnuz Bhekani Zondi waseWema, obehlela umcimbi, uthe kuleli hostela kunabafundi abaningi abahlala kulo abafisa ukuzihlela kahle ukuze bathole imisebenzi bangagcini sebewele esilingweni sokusebenzisa izidakamizwa ngoba bengayitholi imisebenzi.
“Kubalulekile ukuthi sitshale imbewu kubafundi besebancane singasukumi ngoba sebeku-matric,” kusho uZondi.
Uthe umcimbi, obekungowokuqala kulo nyaka, bazowenza yonke iminyaka. Okunye athe bahlose ukukwenza ngawo wukuthi kujwayeleke ukuthi ihostela aliseyona indawo ehlala amadoda kuphela kodwa sekukhona abesifazane nezingane ezifundayo, abafisa ukuthi zihlale endaweni enamagumbi emindeni.
Uthe indlela okuhlalwa ngayo okwamanje ayikuvumeli ukuthi umndeni ube nendawo esesithe okubuye kuholele ekutheni izingane zibone izinto eziningi ezenziwa ngabantu abadala bese zifisa ukuzenza.