‘Sizoya ngenkani emaphoyiseni’
IFUNGA iyagomela iDA ithi izoya ngenkani eziteshini zamaphoyisa iyohlola ukusebenza kwazo nakuba sekuphume incwadi evimba amaqembu ezepolitiki ukuba agasele eziteshini zaKwaZuluNatal engacelile.
IBamba likaKhomishana wamaphoyisa eKZN, uLieutenant General Nhlanhla Mkhwanazi, lisanda kukhipha incwadi evuthayo ethi akekho usopolitiki ovunyelwe ukufuhleleka esiteshini engacelanga, afike apekequle afune namabhuku ezimali. Lokhu kungenxa yokugasela kweDA eziteshini ezehlukene ithi izohlola isimo.
Encwadini uMkhwanazi uthi akukhathalekile noma ngabe yiliphi iqembu elifikayo alingemukelwa futhi linganikwa lutho elikufunayo. Udaba lucasule iDA yaze yalanda umholi wayo kuzwelonke, uMnuz Mmusi Maimane, obeseThekwini ngoMgqibelo, ezophikisa incwadi ekomkhulu lamaphoyisa esifundazweni. Ufike ehambisana nomholi waKwaZulu-Natal, uMnuz Zwakele Mncwango, bayihlaba bayihlikiza indaba yencwadi kaMkhwanazi bathi ishaye eceleni. UMaimane uthe banelungelo elisemthethweni lokugasela eziteshini ngoba bamele abantu.
‘’Lowo okhiphe incwadi angazosijwayela kabi asiyingeni indaba yayo. Umbhedo wani lowo awushoyo. Le nto iphambene nomthetho futhi thina sifuna ukubambisana namaphoyisa hhayi ngoba silwa nawo. Sifuna ukwazi ukuthi yini le efihlwayo eziteshini abangafuni siyibone,’’ kusho uMaimane enanelwa yihlombe labalandeli beDA. Uthe amaphoyisa awakwazi ukuzenzela umathanda engagadwe muntu futhi amalungu eSishayamthetho abekelwe lokho ukugada ukusebenza kwezikhungo zomphakathi.
“Ngingama kanjani nje ePhalamende ngitshele izwe ukuthi angikwazi ukuyohlola isimo esiteshini esithile? Bazothini abantu uma bezwa leyo nto njengoba bethembele kithina. Uke ufike esiteshini ubone ukuthi amaphoyisa awazi lutho kuduma upotiyane uma uwabuza,’’ kusho uMaimane.
Uthe banika uMnyango wezokuThutha nokuPhepha koMphakathi KwaZuluNatal izinsuku eziwu14 ukuba uphendule esikhalweni sabo. Isithunywa ebesivela emnyangweni simukele incwadi sathi sizoyedlulisela kuMnuz Mxolisi Kaunda onguNgqongqoshe womnyango bese ephendula.
NoMncwango uhambe emazwini kaMaimane wathi uMkhwanazi ushaye phansi-ke ngoba bazoqala phansi ukuhambela iziteshi.