Ithemba kutholwa izinkomo ebezebiwe
KUBUYE ithemba eManguzi lokuthi izogcina iphumelele imizamo yokulwa nokwebiwa kwemfuyo ngemuva kokutholwa kwezinkomo ezebiwe ezingu-26 kwaboshwa nabasolwa abane.
Lezi zinkomo kusolwa ukuthi bezebiwe eMozambique zazofihlwa eManguzi ngesonto eledlule.
Lokhu kulandela uphenyo olunzulu lwamaphoyisa olubheka isihlava sokwebiwa kwemfuyo eManguzi nasemazweni asondelene nayo.
Ngokusho kokhulumela amaphoyisa KwaZuluNatal, uColonel Thembeka Mbele, bekunomkhankaso obubheka imfuyo eyebiwe ngesikhathi kutholwa imfuyo kuboshwa nabasolwa.
“Amaphoyisa aseManguzi nawaseMozambique ayasebenzisana ukulwa nenkinga yokwebiwa kwemfuyo kanti ngoLwesibili oludlule kutholwe izinkomo ezingu-26 ebezintshontshiwe. Kuboshwe abasolwa abane abaneminyaka ephakathi kuka-18 no-26. Basolwa ngokuthi bantshontshe imfuyo eMozambique beqa nayo umngcele bafika eMtikini, eManguzi bayibeka khona,” kusho uCol. Mbele.
Abasolwa kulindeleke ukuba bavele enkantolo yaseMozambique maduze njengoba bebesagcinwe esiteshini saseManguzi kuze kube bathunyelwa eMozambique.
Uthe bazobhekana namacala amabili, elokweba imfuyo nelinye lokuphula imithetho yokweqa imingcele.
Izinkomo ebezintshontshiwe zibonakale ngezimpawu ezifakwa emfuyweni ezisuke zikhomba ukuthi ngobani abanikazi bayo.
Ngokusho kwamaphoyisa izinkomo zisagcinwe eBabanana ukuze zizohlolisiswa bese zinikezwa abanikazi.
Isolezwe lithole ukuthi ukuboshwa kwabathintekayo kulethe ithemba emphakathini waseManguzi njengoba udaba lokwebiwa kwemfuyo bese luwuhluphile umphakathi njengoba kusolwa ukuthi imfuyo eyebiwa khona iweliswa umngcele iyiswe kwamanye amazwe bese kuthi evela kwamanye amazwe ifakwe eManguzi ngokungekho emthethweni.
Uphenyo lwamaphoyisa luyaqhubeka njengoba kuthiwa kungenzeka kuboshwe abanye ngokwebiwa kwemfuyo etholakele.