Kubuya indodana yolahleko kwikhilikithi
KUBUYA indodana yolahleko kwikhilikithi yakuleli eshiye ikhala ngokubukelwa phansi eqenjini lesizwe amaProteas.
UKyle Abbott uzophinde abonakale egijima kuleli ngemuva kweminyaka emibili edlala phesheya kwezilwandle kwiHampshire yase-England, kwiCounty Cricket.
U-Abbott ongowokuzalwa eMpangeni, KwaZulu-Natal, uzogijimela iDurban Heat ezoyibamba kwiMzansi Super League T20, okuwumqhudelwano omusha wekhilikithi kuleli ozoqala maphakathi nenyanga ezayo.
Lo mqhudelwano uzodlalwa ngamaqembu ayisithupha, aqhamuka ezifundazweni ezahlukene. U-Abbott uthi uyakuthokozela ukubuya ezodlala ikhilikhithi kuleli, ikakhulukazi ukubonwa ngabantu baseThekwini, athi ubathanda ngenhliziyo yakhe yonke.
“Ngijabule kakhulu ngokuba yingxenye yalo mqhudelwano oyingqophamlando. Ngihleze ngikuthokozela ukudlala eKingsmead, akusavumi ngilinde ukudlala phambi kwezihlwele zaseThekwini,” usho kanje u-Abbott.
Ngesikhathi kwethulwa iqembu laKwaZulu-Natal, iDurban Heat ngoLwesihlanu eThekwini, isikhulu esiphezulu kwiHollywoodbets Dolphins, uHeinrich Strydom, siveze ukuthi sijabule ngesibalo sabadlali abagijima kwiDolphins abayingxenye yalo mqhudelwano.
“Besithukile ukuthi ngabe iqembu lizoma kanjani kodwa sijabule ngendlela eligcine likhethwe ngayo. Besivele sinesifiso sokuthi sibe nabadlali abaningi baKwaZulu-Natal, bese sigcwalisela ngalabo abambalwa abaqhamuka kwezinye izifundazwe. Kuyajabulisa ukuthi iDolphins izoba nabadlali abayisishiyagalombili, abazoba yingxenye yeqembu iDurban Heat,” sisho kanje lesi sikhulu.
IDurban Heat izoqeqeshwa umqeqeshi weDolphins uGrant Morgan. Umdlalo wokuqala weHeat, izowudlala neCape Town Blitz, eKingsmead ngoNovemba 18.
Sebebonke abadlali beDurban Heat:
Hashim Amla (ongukaputeni), Rashid Khan, David Miller, Heinrich Klaasen, Kyle Abbott, Keshav Maharaj, Khaya Zondo, Albie Morkel, Marchant de Lange, Vernon Philander, Brandon Mavuta, Temba Bavuma, Morné van Wyk, Okuhle Cele, Sarel Erwee noTladi Bokako