UMicho uqagele ikusasa likaMokwena
UMQEQESHI we-Orlando Pirates, uMilutin “Micho” Sredojevic, ubona iphini lakhe uRulani Mokwena kuyilona eliyohola eZimnyama lizifake “ezweni lesethembiso”.
NjengoMose eBhayibhelini, owajutshwa ukuba ahole isizwe sakwaIsrael eyosifaka eKhenani, wagcina ngokuyibuka, abantwana bakwaIsreal bangena ezweni lesethembiso sebeholwa uJoshuwa owayebatshazwa ubuhlakani.
USredojevic uthe ukuhlula iKaizer Chiefs emdlalweni we-Absa Premiership eFNB Stadium ngoMgqibelo, kuyigxathu elibalulekile ekwakheni iqembu elinokuzethemba emkhankasweni wokubuyisa injabulo kwiPirates. EZimnyama zinqobe ngo 2-1 wamagoli ka-Innocent Maela noVincent Pule. IChiefs ibikade ibekwe phambili nguKhama Billiat.
UMicho ubuye eMzansi ekuqaleni kwesizini edlule emuva kokuthi iPirates ihluleke wukungena kwi-Top8 ngesizini eyandulela leyo. Esithangamini nabezindaba emuva kowabakhaya uMicho, ufane nomphrofethi eqagela ngekusasa likaMokwena ethi uyena ozohlala kwiPirates njengowayengumqeqeshi weManchester United, uSir Alex Ferguson oqeqeshe leli qembu iminyaka ewu-27.
Yize engazange ambize ngegama kodwa bekucaca ukuthi ukhuluma ngoMokwena.
“Leli yiqembu elibe likhulu kusuka ngo-1937. IPirates izoqhubeka ngami, futhi iPirates izoqhubeka kakhulu emuva kwami. Ngibusisiwe futhi nginenhlanhla ngokuba kulesi sikhundla. Angifuni ukucabanga ngidlule emdlalweni olandelayo. Kodwa emuva kwami kunomuntu engikholwa wukuthi ngelinye ilanga, njengomjaho we-relay kwezokusubatha, ngiyomnikeza induku aqhubeke. Futhi uyohlala isikhathi eside njengoSir Alex Ferguson. Ngeke ngisho ukuthi ubani kodwa ningaqagela. Kuhle ukubona ukuthi siyasebenza, uyakhula. Ngiyaziqhenya ngokuthi uyakhula futhi ngizizwa ngikhethekile ngokusebenza naye,” kusho uMicho. Emdlalweni wabakhaya, iPirates ikhombise ukungadikibali ngisho unozinti weChiefs, u-Itumeleng Khune esevimbe iphenathi. USredojevic uncome abadlali bakhe ngokuqhubeka nokulwa.
“Emizuzwini engu-20 kuya kwengu-25 iChiefs kade ingaphezu kwethu, yashaya igoli elisivuse emaqandeni. Sathola iphenathi uKhune wayibamba. Lokhu kunike iChiefs okukhulu ukuzethemba. Bekufanele silwe kakhulu. Konke ebesikade sikuhlelile kuhambe kahle. Ngibonga abadlali ngokungabhocobali emuva kokuhlulwa yiphenathi.
LNgibonga ithimba labaqeqeshi ikakhulukazi uRulani okhulume inkulumo ehunyushwe njengokungahloniphi izimbangi ekubeni kungenjalo. Kuyingxenye yomdlalo. Ingagqugquzela izimbangi ukuthi zize kithina. Emuva kokuhlulwa yiphenathi bekungelula kodwa uMdali ubenohlelo ngathi. Wonke umdlalo ubalulekile, asinalo ilungelo lokujabula kuze kweqe,” kusho uMicho.
Emdlalweni olandelayo iPirates izobhekana naMaZulu FC kuma-quarterfinal eTelkom Knockout ngempelasonto.