Injabulo kunqoba amaSharks
IKUPHI isidingo sokukhulula abantu ukuba basebenzise umthunzi wezinkukhu ngaphandle kokuba novalo lokuvalelwa ejele uma kukhona ubumnandi obufana nalobu enhliziywen? Angikholwa wukuthi bukhona enhliziyweni kumbe ikhona into engangenza ngizizwe kanje ngaphandle kokudla lesi sicoco kule nkundla sihlula iWestern Province.”
Lawa amanye amancoko abalandeli beCell C Sharks abebejabule ngendlela exakayo kuphela umdlalo wamanqamu weCurrie Cup lapho iqembu labo linqobe khona ngo 17-12 obuseNewlands Stadium, eKapa.
Ngemuva kwalo mdlalo iSharks ivulele abalandeli bayo ekhasini layo le-twitter lapho bebenikwa khona ithuba lokuphefumula ngengqophamlando yewini. Abazange baliyeke leli thuba.
Obekubenza bajabule kakhulu wukuthi bekulindeleke ukuthi zikhale ngaphansi ezikaRobert du Preez lapha uma uzokhumbula ukuthi iProvince ibidlalela ekhaya kanti ayizange ishaywe isizini yonke. Iqembu laseKapa liye eThekwini lafike layinenebulela ekhaya iSharks ngamaphuzu angaphezulu kwawu-50.
Bese kungokwesishiyagalolunye kusukela ngo-1984 la maqembu ebhekana kowamanqamu womqhudelwano omdala futhi omkhulu cishe kunayo yonke emazweni adlala umbhoxo. Ukube iProvince inqobile lapha ibizobe isiyiphinda okwesibili iSharks iminyaka ilandelana kwazise ezikaDu Preez zikhale ngaphansi ngesizini edlule.
Phakathi kwezinto ebezijabulisa kakhulu abalandeli beSharks wukuthi iqembu labo liyeke ithuba lihamba phambili ngo 21-15 nyakenye lavumela iqembu laseKapa lagoduka nesicoco. Abalandeli bebejabule kufanele ngoba abadlali babo bakhombise ukuzinikela okuyisimanga kulo mdlalo. Bekwala noma sekucaca ukuthi izinto kazihambi kahle kodwa belokhu bengenile empini abadlali beSharks ikakhulukazi abaphambili.
Bese kungokwesithathu la maqembu ebhekana kowamanqamu weCurrie Cup eKapa kusukela ngo-1984. Kuleyo midlalo iProvince isaphumelele ukunqoba emibili.