I-Arrows iziphuthisele ngamathuba
ILAMONTVILLE Golden Arrows iyeke inqwaba yamathuba abezoyihlomulisa ngamaphuzu amathathu amqoka emdlalweni we-Absa Premiership ewudlale izolo ntambama neSuperSport United eMbombela Stadium.
Njengenjwayelo emidlalweni la maqembu aseyidlalile selokhu kuqale iPremier Soccer League (PSL), iSuperSport iqale kahle isizwa nawukuvuza kwezandla zikaNkosingiphile Gumede obevimbele Abafana Bes’thende.
Yize uClinton Larsen ekhale kakhulu ngokulinyalelwa ngabadlali abamqoka njengoDanny Phiri, Sandile Zuke noDevine Lunga, noKaitano Tembo ubebhekene nesimo esifanayo ngoba u-Evans Rusike, ongumgadli wakhe ophambili, ubengadlali ngenxa yokulimala. NoFagrie Lakay ubengekho noThabo Mnyamane.
Ize yaphela imizuzu yokuqala eyishumi kusebenza uGumede eziphumulele uRonwen Williams ngakolunye uhlangothi. Kujabulisile nokho ukubona uSiyanda Zwane enkundleni ekade ephume ngohlaka emdlalweni odlule ephuthunyiswa esibhedlela.
Kuze kwaba maphakathi nesiwombe sokuqala kungacaci ngeqembu eliphethe umdlalo ngoba ne-Arrows eqale yathwala kanzima ibisiqala izama ukuhlanganisa amaphasi. Ngomzuzu ka-43 iSuperSport ilitholile igoli ngekhanda likaJames Keene ngemuva kwephutha likaGumede. Nakuba ezamile uNkosinathi Sibisi kodwa akumsizanga ngoba uzame ukumisa ibhola esikhundleni sokususa umhlola ekhaya.
Kuphinde kwamhlasela ukulimala uLarsen kuphuma ukaputeni wakhe, uNkanyiso Mngwengwe, ngomzuzu ka-57. Ngemuva kwalolu shintsho izinto zithe ukuguquka kancane emuva ngobae bese kungekho mholi yize indawo ibikade ithathwe uMusa Bilankulu. Ngisho isilandela ngemuva i-Arrows kodwa ibilokhu iwakhe njalo amathuba kusho khona ukuthi abagadli bayo abekho bukhali ngendlela ebidingeka.
Ngomzuzu ka-68 uSiboniso Conco ubuyisele Abafana Bes’thende emdlalweni ngegoli alishaye kade ephaselana kamnandi noSibusiso Sibeko obengene esiwombeni sesibili. Seziyela ngasemaphethelweni bese zithengana futhi kucaca ukuthi sekuzosebenza ukuthi wubani owasebenzisa ngendlela amathuba abevela. Uze waphela umdlalo zilokhu zithusana kodwa lingekho elicacisayo ukuthi amaphuzu ayahamba aya eThekwini noma ayasala eMbombela.