Buyaphela ubumpohlo kuDJ Muntu
UDJ Muntu Master Blaster usethathe isinqumo sokushadelwa yisithandwa sakhe seminyaka ngoba sesiwe sivuka naye.
UDJ Muntu (61) uthatha uDineo Mohapi (31) waseClermont, eThekwini.
“Into engiyithandayo kuye kakhulu wukuthi ngike ngaba sesimeni esibi kakhulu empilweni yami kodwa waba nami wakwazi ukunginakekela. Kumfanele ukuthi abe wunkosikazi,” kusho uMuntu.
Lo DJ odlala ezamzukwana, uke wagula walaliswa esibhedlela.
Uthe ngoDisemba 29 uyombesa eClermont kubo kwesithandwa sakhe.
“Ngenza umembeso omkhulu ngalolu suku bese kuthi ngoFebhuwari kube wumshado omhlophe. Yinto enkulu le engiyenzayo,” kusho yena.
Uthe ngenyanga ezayo bazohlanganisa iminyaka engu-11 bethandna.
“Asinayo ingane, nginezingane eziningi engazithola kwezinye izindawo. Nginezingane eziwu-13 sezizonke.
Noma ngingangayithola kuye, akulutho, anginankinga,” kuchaza uMuntu.
Uthe yena noDineo bahlangana ebumnandini, wambuka wamthanda wabe esemqonda ngqo, wamshela.
“Buka uhamba ngemoto, ngamthengela nemoto yakhe enhle iMitsubishi eyiSUV i-ASX,” kusho uMuntu.
Uthe isithandwa sakhe usebenza naso ngoba yiso esibhekelele ukuqashwa kwakhe emicimbini anandisa kuyo.
UDineo uthe ujabule kakhulu ngalokhu.
“Izindaba ezinhle lezi. Sibambisene kahle othandweni lwethu, konke kuhamba kahle,” kusho uDineo.