Usesibhedlela abathi ushiswe yiphoyisa
ILALISWE esibhedlela indoda yaseMatikwe, eNanda, okuthiwa ibhunyelwe yiphoyisa ngophethroli layishisa ngaphambi kokuthi lishise nendlu yakubo entathakusa yangeSonto.
Umndeni kaMnuz Wonder Zwane (28) uthe akakwazi ngisho ukuziyela ethoyilethi ngenxa yokushiswa yiphoyisa ebelimsola ngokweba imali yentombi yalo. Unina kaZwane, uNksz Gugu Zwane, uthe iphoyisa elisolwayo lijwayele kaZwane ngoba likhanda khona izimoto. Nentombi yalo iyavakasha kuzophuzwa futhi abakaze baxabane nephoyisa.
“Intombi yephoyisa ithe ayisawuboni uR400 esikhwameni ebikade ihleli nawo endlini kuphuzwa. Iphoyisa lifikile lizobuza indaba yemali labuye lahamba. Libuye entathakusa ngezithuba zabo-4 selizoshisa indlu, labhunyela noWonder ngophethroli. Ngisho ezama ukubaleka belifuna ukumphindisela endlini, eshayo,” kusho uNksz Zwane.
UZwane uphuthunyiswe emtholampilo wafika khona wadluliselwa esibhedlela. Uthe umndeni uyesaba ngoba abazi noma iphoyisa lizobuya yini lizobaqedela.
UNksz Zwane uthe indodana yakhe ibhandishwe ngisho nasebusweni ivele ngamehlo ngenxa yokusha. Uthe kufike amaphoyisa ezobalanda ukuyobhala isitatimende ngezithuba zabo-8 ebusuku, bavula necala esiteshini eMtshebheni. Kuthiwa iphoyisa elisolwayo lisebenza kusona lesi siteshi.
UNksz Zwane uthe bashelwe ngisho yizingubo zokugqoka nempahla yasendlini, basakhoseliswe omakhelwane.
Umfowaba kaZwane, uSiphesihle Zwane (16), uthe naye usinde ngokulambisa. Uthe ubesendlini ngesikhathi kusha, waphuma ngesamagundane. Ukugcizelele ukuthi indaba isuswe wukulahleka kwemali kodwa ayintshontshwanga yibona.
Kuthintwa iphoyisa, uMnuz Vee Ngobese, uthe uyasukelwa. Uvumile ukuthi uyiphoyisa futhi uyawazi umndeni ukhanda kuwo imoto.
“Ngiwazwile lawo mahlebezi okuthi kukhonjwa mina ngokushisa umuzi. Ngigcine kulo muzi kungakenzeki lutho ngoba ngikhanda khona imoto. Ngithe sengifika emsebenzini namhlanje (izolo) ngathola ukuthi kusolwa mina,” kusho uNgobese.
Uthe uzamile ukuyozizwela emndenini kodwa watshelwa ukuthi uNksz Zwane usesibhedlela.
Okhulumela amaphoyisa KwaZulu-Natal, uLieutenantColonel Thulani Zwane, uthe kuvulwe icala lokushisa kodwa akukaboshwa muntu. Akazange akuqinisekise ukuthi umsolwa uyiphoyisa.