Ugwetshwe udilikajele owabulala wabamba inkunzi owesifazane
INKANTOLO eNkulu yaseMadadeni igwebe udilikajele neminyaka engu-15 ngaphezulu owesilisa olahlwe yicala lokubulala nokubamba inkunzi.
UMncedisi Happy Bici (34) ugwetshwe ngoLwesihlanu udilikajele ngecala lokubulala, wabe esegwetshwa iminyaka engu-15 ngecala lokubamba inkunzi.
Ukugwetshwa kwakhe kwenzeke ngemuva kokuthi inkantolo ilalele ubufakazi bokuthi wambulala kanjani uNksz Busisiwe Margaret Mdlalose (28) eMondlo.
Kuthiwa ngoSepthemba 14 nyakenye uNksz Mdlalose wasuka ekhaya eyobona ikhasimende elithile eNkande eNquthu njengoba umufi ayesebenzela inkampani yomshwalense.
Ngalolo suku kuthiwa umufi akazange abuye ekhaya.
Umuntu ozilusela izinkomo endaweni kuthiwa wabona indoda nowesifazane behamba beya ngasemfuleni kodwa wangasola lutho.
Ngemuva kwesikhashana indoda kuthiwa yabuya yodwa ngasemfuleni owesifazane engasekho.
Ngosuku olulandelayo kuthiwa izingane ezazizidlalela eduze komfula zabona isidumbu somuntu sintanta emfuleni zabe sezibikela amaphoyisa.
Amaphoyisa avula idokodo aqala uphenyo olwaholela ekutheni kuvele ukuthi umufi uklinyiwe isidumbu sakhe sabe sesiphoswa emfuleni.
Ngemuva kophenyo olunzulu uBici wabe eseboshwa wabekwa icala lokubulala umufi kulandela ukuthi isikhwama neselula kaNksz Mdlalose kwatholakala kuyena.