UMalema ugxeke iSasco ekhankasa
UMENGAMELI we-EFF uMnuz Julius Malema, usekuchithile ukuthi leli qembu lesekwa abantu abasha abangafundile.
UMalema obekhuluma esikhungweni semfundo, iVaal Univeristy of Technology eGoli, uthe ezikhungweni zemfundo kugcwele izitshudeni ezifundile.
Uthe ngesikhathi belwela imfundo yamahhala ezikhungweni zemfundo babizwa ngawo wonke amagama.
“Sabizwa ngabantu abasebenzela amanye amazwe, kubuzwa ukuthi sicabanga ukuthi imali izobe iqhamukaphi? Kwathiwa kuzofa abantu kodwa asikho isitshudeni esafa ngesikhathi kuyobhaliswa ezikhungweni zemfundo, sekunemfundo yamahhala,” kusho uMalema. Uthe namanje basafuna ukuthi kuqashwe ngokugcwele abasebenzi abahlanza izikhungo nabazigadayo.
“Uma beqashwa laba basebenzi izingane zabo zizofunda mahhala njengoba kwenzeka ukuthi izingane zabafundisa ezikhungweni zifunda mahhala. Uma ofundisayo enyuvesi enemedical aid, impesheni neminye imihlomulo kumele bazithole. Izikhungo eziningi ziyaqhubeka nokuqasha ngokugcwele laba basebenzi, impi sizoyiwina,” kusho uMalema.
Uthe uma bethi bafuna umhlaba abafuni ukuthi kuphazamiseke ukulinywa kokudla. “Sifuna umhlaba unikwe abantu abafuna ukuwulima, hhayi noma ngubani ongazi uzowenzani. Uma ungumlimi unomhlaba omkhulu, sitshele mngakanani onawo bese ugcina umhlaba othile ukulima, omunye unikwe abanye abantu. Lokhu ngeke kuwuwise umnotho,” kuqhuba uMalema. Uthe abantu abamhlophe ababafuni abamnyama eduzane kwabo ngoba abafuni abamnyama ukuthi bathole izidingo ezifana nezabo. Uqhube wathi kudingeka kulinywe ukudla okuningi ukuze kungabizi kakhulu.
“Indaba yomhlaba ifana nobudlelwano ingane eba nabo nonina oyizalayo ngoba bahlanganiswa wumzanyane. Asiyifuni indaba yamatayitela, amanga indaba yokuthi abangenawo amatayitela ngeke bakwazi ukuboleka imali. Umhlaba okwakhiwe kuwo iMall of Africa (eMidrand eGoli) uphethwe umndeni wamaNdiya. Uma uthenga indawo eduzane kwale nxanxathela yezitolo, uthola isivumelano sokuthi uthenge indawo awutholi kodwa itayitela,” kusho uMalema.
Uthe bahlaselwa nxa zonke beyi-EFF ngoba ikhuluma izinto okuyizo.
“Kwanyamalala u-R2 billion ebhange iVBS Mutual. I-ANC yathatha imali ukuze ixhase umkhankaso wayo wokhetho. Manje babona igama likaShivambu base behlala kulona, abasavezwa abanye,” kusho uMalema.
Uthe uNobhala jikelele we-SACP uDkt Blade Nzimande, kumele ayokhuluma iqiniso kwikhomishini yejaji uZondo ephenya ngokulawulwa kombuso yidlanzana.
Uqhube wathi bayisibonelo kwezemfundo njengoba kusasa ezobhala izivivinyo.
“Ningafani neSasco, nihlale ningasuki ezikhundleni ngoba ningafuni ukuqeda ukufunda. Uma usunguMengameli womkhandlu wezitshudeni hlala nabanye ozakwenu ungayi kwenye indawo ewubukhazikhazi.”
Unxuse izitshudeni ukuthi uma sezikhethiwe zingebi imali, zifune ukube abangani nabaphathi ukuze zigwazelwe.
Usho lokhu nje namhlanje kunokhetho lwezitshudeni kulesi sikhungo.