Kumbiwe isidumbu ‘sowayeyothwasa’
SIMBIWE izolo emathuneni aKwaGijima eGreytown, isidumbu sowesifazane owangcwatshwa ngephutha umndeni okungesiwo ngo-Ephreli nonyaka. Izolo, amaphoyisa aseKingsley eVryheid ehambisana nabaka-Avbob bambe isidumbu sowesifazane owangcwatshwa ngabomndeni kaNksz Zandile Phungula (27) bezitshela ukuthi isidumbu sakhe. UNksz Phungula wafika kubo emuva kwesonto engcwatshiwe.
Isidumbu salo wesifazane obembiwa kukholakala ukuthi ngesikaNksz Sbongile Zikalala (36), owaduka eyothwaswa emfuleni waseBlood River.
Isolezwe libikile ngalolu daba ngoEphreli nonyaka ngesikhathi kufika owesifazane kwabaleka abantu ngoba bezitshela ukuthi yisipoki, kwazise babezitshela ukuthi usashona. Isolezwe laphinde labika ngesikhathi sekuvela umndeni wangempela walo wesifazane okwakuthiwa ungcwatshiwe. Isolezwe lithole ukuthi njengoba sekumbiwe lesi sidumbu sizobe sesiyiswa emakhazeni kahulumeni eNewcastle lapho kuzokwenziwa khona ulibofuzo oluzoqinisekisa ukuthi ngesikaNksz Zikalala ngempela yini. Uma sekuphothulwe ulibofuzo umndeni uzobe usuthatha isidumbu bese uyazingcwabela. Omunye umthombo weSolezwe osondelene nodaba uthe isidumbu salo wesifazane bese sonakele kwazise sasingcwatshwe ngengubo kanti kulekelele namachemicals ukuqeda iphunga laso. Abomndeni kaNksz Zikalala bathe bazolinda ulibofuzo oluzoqinisekisa ukuthi nguye ngempela yini. UNksz Tholakele Buthelezi, oyisihlobo sikaNksz Zikalala watshela Isolezwe ukuthi babengazitsheli ukuthi isidumbu esakhishwa emanzini ngesikamufi. Babekholelwa ukuthi uyathwasa emanzini, usazobuya ngakho bangalivula icala lokulahleka kwakhe. Baze baya emaphoyiseni sebethole ukuthi isidumbu esatholwa akusona esakwaPhungula. Babona ngezithombe ezashuthwa ngamaphoyisa nezingubo ukuthi kungenzeka kube ngesikaNksz Zikalala.
UNksz Phungula wathi wayezihlalele nomunye ugogo eNsuze ngoba engenayo imali yokubuyela kubo eGreytown njengoba wayebalekile eVryheid lapho ayehlala khona. Izolo ayiphumelelanga imizamo yokuthola umndeni kaNksz Phungula.