Sinconywa wongoti isidlo sasekuseni
BANINGI okuthiwa bakuthatha kancane ukubaluleka kwesidlo sasekuseni, abanye okulula ukuthi baseqe.
Kuleli sonto kuqwashiswa ngokubaluleka kwesidlo sasekuseni njengoba bekunomkhankaso weNational Nutrition Week, elandelwa yiNational Obesity Week kuleli sonto. Abagqugquzeli bomkhankaso weNutrition Week bathi kuzo zonke izidlo zosuku, kujwayelekile ukuthi seqiwe esasekuseni ekubeni kuyisona esibaluleke kunazo zonke.
Bathe ezinye zezizathu ezibekwa abantu abangasidli isidlo sasekuseni ukuthi abazi ukuthi bazodlani nokuthi abalambi ekuseni. Kuvele ukuthi kukhona nabazincisha isidlo sasekuseni ngoba befuna ukuncipha.
Izinhlangano ezeseka umkhankaso weNutrition Week okubalwa i-Association for Dietetics in South Africa, Nutrition Society of South Africa, Heart and Stroke Foundation South Africa, Consumer Goods Council of South Africa, Cancer Association of South Africa neConsumer Education Project of Milk SA ziyavumelana ngokuthi akukho okwedlula isidlo sasekuseni. Umbiko okhishwe yilezi zinhlangano uyakuphikisa ukuthi ukweqa isidlo sasekuseni kusiza kwabafuna ukuncipha emzimbeni. Kuthiwa ucwaningo luveza ukuthi yibona abasengcupheni yokukhuluphala kakhulu ngoba emini badla izidlo ezingenampilo bezama ukuvala isikhala. Okunye okunconywa ngesidlo sasekuseni ukuthi sisiza ukusebenza kahle komqondo, sinciphise namathuba okuhlaselwa isifo sohlangothi, esenhliziyo, ukwenyuka komfutho wegazi noshukela.
Nanka amathiphu ezimpendulo kwabanenkinga yesidlo sasekuseni:
*Hlela ngayizolo isidlo sasekuseni. Ungabilisa amaqanda ebusuku noma uqobe izithelo ozozidla ekuseni, ubeke efrijini.
*Ungasebenzisa nokudla okusale ngayizolo ukwenza isidlo sasekuseni. Izidlo ezisalile ungazifaka esinkweni wenze isemishi.
*Izingcezu ezimbili zesinkwa noma i-yoghurt nezithelo, zingakusiza ekuqaleni usuku. Gwema izidlo ezinoshukela kakhulu ekuseni ezingakwenza ucobeke usuku lonke.
*Gxila ezidlweni ezinika umdlandla nezine-fibre ukuze ungasheshi ukulamba.
*Kujwayeleke ukuthi izingane zincisheka isidlo sasekuseni kanti yiso esenza zikwazi ukucabanga kahle esikoleni. Abadala abadle ndawonye nezingane ukuze zikhuthazeke ukudla ekuseni.