Uzokhipha entsha uKelly Khumalo ozizwa esengcono
INTOKAZI iphimbo layo elishiya abaningi benemizwa ehlukene uma icula, uKelly Khumalo uveze ukuthi usedlule ezintweni eziningi ezimbi empilweni kodwa manje usezizwa engcono kakhulu emoyeni.
Engxoxweni ekhethekile neSolezwe, uKelly uthi ukube uvumele abantu abahlukene empilweni yakhe bamdicilele phansi ngabe mhlawumbe sewafa.
Kulezi zinsuku le ntokazi akukho ekukhulumayo ngaphandle kwe-albhamu yayo ezophuma ngoNovemba ebizwa ngokuthi Unleashed.
NgoJulayi wakhipha ingoma ethi Jehova, kwathi ngo-Okthoba 12, waphinde wakhipha enye ethi Dance Comigo ezizotholakala kuyona le albhamu.
Uthe kule albhamu ezophuma ngabe wenza iphutha uma engambongi uMondli Ngcobo, owenze umsebenzi oncomekayo.
“UMondli ngomunye wabaculi nophinde abe nguphrojusa onethalente eliyisimanga. Wenze umsebenzi oncomekayo ezingomeni ezimbili ezikhona kule albhamu njenge Dance Comigo. Ingoma ethi Jehova ngangibonga ngayo uNkulunkulu ngakho konke angenzele khona. Lena ethi Dance Comigo ngibonga ngayo wonke umlandeli wami njengoba ngiyiqambe ngolimi lwesiPutukezi nje. Yingoba ngifuna ukujabulisa wonke umlandeli wami,” kuchaza yena.
UKelly ebuzwa ukuthi ngabe usekhona yini umuntu athandana naye njengoba esanda kusuka umsindo evela nowesilisa onguChad Da Don, uthe angakusho ukuthi ujabule.
“Ngijabule kakhulu, ngeke ngiqambe amanga uma ngiza ngakulowo mkhakha,” kusho uKelly.
UKelly uphinde wangathanda ukukhuluma ngendaba yakhe esanda kuvela yokuthi uyathwasa.