Izitshudeni zibalisa ngokuxhashazwa wumnyango
BAKHALA ngokuxhashazwa uMnyango wezeMfundo abaqeqeshelwa umsebenzi emahhovisi awo eTruro House eThekwini, iningi labo okuyizitshudeni.
Kusukela ngoMsombuluko ezinye izitshudeni zingene esitelekeni zikhala ngokuxhashazwa. Zisola ukuthi umnyango uyazisebenzisa ukudla amandla azo ekubeni zingaqashwa ngokugcwele.
Omunye wazo osemkhakheni wezindaba zabasebenzi, uthe ujoyine isiteleka ngoba usekhathele ukuxhashazwa. Uthe waqala ngoMeyi ngonyaka odlule ukusebenza kula mahhovisi engatholi ngisho imali yokugibela. Uthe baqale nonyaka ngoJuni ukuthola uR3 000 ngenyanga.
“Ngafika ngizoqala ukuqeqeshelwa umsebenzi nganikwa inkontileka yezinyanga ezingu-18, okusho ukuthi iyaphela ngoNovemba.
Kusiphatha kabi ukuthi kwathiwa ngeke siqashwe ngoba izikhala zemisebenzi zamiswa ngo-2008 kodwa siyabona abanye beqashwa phambi kwethu,” echaza.
Omunye oqale ukuqeqeshelwa umsebenzi nonyaka uthe unikwe inkontileka yeminyaka emibili. Uthe ziningi izikhala ezavuleka ngenxa yokwesula nokushona kwabantu kodwa kusetshenziswa bona bengaqashiwe ngokugcwele.
“Ngafika ngo-2016 ngizoqeqeshwa izinyanga ezintathu ukuze ngikwazi ukuthweswa iziqu. Ngabuyela esikoleni ngathweswa iziqu, ngabuya sengizovolontiya eTruro House. Ngize nganikwa inkontileka ngo-Agasti nonyaka nakhona ezophela bese ngingaqashwa ngokugcwele,” kusho omunye.
Lezi zitshudeni nayizolo bezisaqhubeka nokubhikisha ngaphandle kwamahhovisi.
OnguMengameli we-Educators Union of SA, uMnuz Scelo Bhengu uthe banobufakazi bokuthi kukhona abaqashiwe yize umnyango uthi izikhala zemisebenzi azikho.
“Umnyango uyazixhaphaza lezi zingane ngoba zenza imisebenzi yabantu abashona abanye abathatha umhlalaphansi. Kungani bengaqashwa ngokugcwele abazovala lezi zikhala, kunalokho sithole ukuthi kukhona abaqashwa isinyenyela kwezinye izikhala ezingakhangiswanga? Sifuna umnyango uphenye ngoba ezinye zalezi zingane aziyitholi nemali, umnyango uthi awungeni lapho,” kusho uBhengu.
Ephawula kwiDaily News enguzakwabo waleli phephandaba uMnuz Muzi Mahlambi okhulumela umnyango, uzichithile izinsolo. Uthe abaqeqeshelwa umsebenzi banikezwa inkontileka okuthi uma isiphelile kuthathwe abanye. Uthe ukuteleka kwabo kuzovalela amathuba nabanye abasafuna ukuqeqeshelwa umsebenzi kula mahhovisi.