Abafundi banqatshelwe ukubhala
KUPHENYWA isikole iSizibeni High eMgababa ngemuva kokuthi abazali bekhononde ngokuthi abafundi baka-matric banqatshelwe ukubhala izivivinyo zephepha lesibili leMaths ngoba kuthiwa bazokwehlisa izinga lokuphasa lesikole.
Bangaphezu kuka-10 abafundi okuthiwa bakhishwe ephepheni sebezobhala kwathiwa ukuze bakwazi ukubhala izivivinyo zokuchibiyela ngonyaka ozayo, abalande izincwadi zodokotela ukuze kube sengathi babegula yingakho bengakwazanga ukubhala.
Omunye wabazali, ocele ukungavezwa, uthe ingane yakhe ibuye ekhaya yamtshela ukuthi inqatshelwe ukubhala iphepha lesibili leMaths ngoMsombuluko ngoba kuthiwa izokwehlisa izinga lokuphasa.
Ingane imtshele ukuthi akuyona yodwa kodwa baningi nabanye abafundi abanqatshelwe bakhishwa sebebhala.
“Ibuhlungu le nto ngoba ingane yami kwi-timetable yayo kubhalwe ukuthi izozibhala zonke izifundo. Ilibhalile iphepha lokuqala leMaths ngoLwesihlanu olwedlule, elesibili akhishwe kulona,” kusho umzali.
Uthe akazi uzoyithathaph imali yencwadi kadokotela ngoba akanayo.
“Ingane yami yadudulelwa kwa-matric kodwa bengazi ukuthi izibhala zonke izifundo,” kusho umzali.
Uthe uma umfundi eduduliwe kumele atshelwe ukuthi nazi izifundo azozibhala ezinye azibhale ngonyaka olandelayo.
“Akukwazi ukuthi angakhishwa esezobhala ngoba kwa-timetable yakhe bekumele ifike inezifundo ezimbalwa azozibhala. Sifuna ukwazi emnyangweni ukuthi ngabe kuvumelekile yini ukuthi izingane zethu zikhishwe ephepheni zingabhali kuthiwe asilande incwadi kadokotela,” kusho umzali.
Omunye umzali naye ocele ukungavezwa, uthe ingane yakhe ayizange ibhale iphepha lesibili leMaths ikhishwe isizobhala. Uthe udidekile ngoba ingane ibuye yamtshela ukuthi esinye isizathu esenze bakhishwe nezinye izingane ngukuthi abazange babekhona ngesikhathi kubuyekezwa isifundo. “Ingane yami yaphasa kahle kwaGrade 11 yayingadudulwanga. Ne-timetable yayo iyasho ukuthi izibhala zonke izifundo okubalwa kuzo iMaths iphepha lokuqala nelesibili obekumele ilibhale ngoMsombuluko kodwa eyakhishwa yangalibhala,” kusho umzali.
Okhulumela uMnyango wezeMfundo, uMnuz Kwazi Mthethwa, uthe
akekho uthisha okumele anqabele umfundi ukuthi abhale izivivinyo.
Uthe baxhumana nehhovisi lesifunda ukuze bathole ubuqiniso balokhu wathi bazothatha izinyathelo ezifanele kwabathintekayo.
“Sithumele kumqondisi wesifunda ukuze aphenye. Sizobe sesithatha izinyathelo ezifanele.”
Ngonyaka ozayo abafundi bazobhala kanye izivivinyo ngoJuni njengoba zingasekho ezokuchibiyela ebezibhalwa ngoMashi.