Onogada banethemba lentuthuko ngamaholo
ONOGADA banethemba lokuthi impilo yabo izothuthuka uma kuwukuthi umthetho wokuthi bahole uR5 558 abakuGrade A kuyaqikelelwa ukuthi uyasebenza.
Labo nogada abangathandanga ukudalulwa amagama basebenzela izinkampani ezihlukene futhi abaningi bakuGrade C.
UNgqongqoshe wezabaSebenzi, uNkk Mildred Oliphant, ushicilele isaziso sokuthi kusukela namhlanje onogada abakuGrade B mabaholelwe uR4 981 ezindaweni zasemadolobheni kuthi abasemakhaya baholelwe uR4 198, abakuGrade C,D no-E baholelwe uR4 377 emadolobheni, emakhaya noma ezindaweni eziqhelile edolobheni baholelwe uR3 643.
“Mina ngisebenza eVryheid, ngiziholela uR2 500 ngenyanga. Ngisebenza amahora ayisishiyagalombili ngosuku kodwa kuyenzeka ukuthi ngisebenze amahora engeziwe. Ngiyafisa ukuthi okushiwo wungqongqoshe kwenzeke kodwa angikholwa ngoba sengathi lezi zinto azilandelelwa,” kusho omunye unogada.
Abanye bathe bazolinda ukuzwa ngezinyunyana zabo ukuthi bazoqala nini ukuhola imali entsha ephakanyiswe nguNkk Oliphant.
UMnuz Delani Phewa onguMgqugquzeli we-African Security Congress neTrade Union of Security Industry of South Africa (Tusisa), uthe into eyenza onogada baholelwe kancane ukuthi amathenda anikwa izinkampani zabathile.
“Uthola ukuthi uhulumeni ukhokhela izinkampani eziqashe onogada uR12 000 unogada eyedwa kodwa bagcine beholelwa oR4 000 nenye imali encane.
“Sizomasha ngoba sifuna uhulumeni aziqashele yena onogada ukuze bakwazi ukuhola imali efanele. Asihambisani nalesi siphakamiso sikaNkk Oliphant, sizoba nomhlangano wokusichitha ngoMgqibelo,” kusho uPhewa.
UMnuz Thembinkosi Mkalipi obhekelele ezokuxhumana eMnyangweni wezabaSebenzi uthe bazoqinisekisa ukuthi lo mthetho uyasebenza ngoba bazothumela abahloli ezinkampanini ezihlukene ukuze bayobona ukuthi onogada baholelwa malini.
Uthe baxoxisene nezinyunyana, abaqashi nonogada ngaphambi kokuthi kumenyezwe lawa maholo amasha futhi babe nezithangami zokucobelelana ngolwazi kuzo zonke izifundazwe.