Umsindo nge-tattoo yephoyisa
LISOBISHINI iphoyisa elisebenza esiteshini samaphoyisa ePinetown, elibonakale esithombeni sephephandaba line-tattoo egqamile engalweni, okuyinto ephambene nomgomo wamaphoyisa.
UConstable Sanele Sophazi (30) kumanje ubhekene nokuthi aqondiswe ubugwegwe kwazise iziphathimandla zamaphoyisa seziqale uphenyo ngodaba lwakhe.
Isithombe esifake uConstable Sophazi obishini, yileso esiphume ephepheni iSunday Tribune lapho kubonakala khona i-tattoo engalweni yakhe yesokudla, egqoke ihembe lamaphoyisa. Leli phoyisa belivele lithandwa ngabantu ezinkundleni zokuxhumana abebelibiza ngesingqazu baze baliteketise ngokulicela ukuthi lizobabopha.
Okhulumela amaphoyisa kuzwelonke, uBrigadier Vishnu Naidoo, uthe umgomo wombutho awuvumi ukuthi kuqashwe umuntu one-tattoo ebonakalayo.
“Uma ufaka isicelo emaphoyiseni, kunesigaba esithi akumele ube ne-tattoo ebonakalayo uma ugqoke umfaniswano, udaba lwephoyisa lwasePinetwon luyaphenywa ukuze kutholakale ukuthi i-tattoo liyenze nini,” kusho uNaidoo.
UNobhala wenyunyana yamaphoyisa nojele, iPolice and Prisons Civil Rights Union (Popcru) KwaZulu-Natal, uNkk Nthabeleng Molefe uthe ngokwazi kwakhe iphoyisa akuvumelekile ukuthi libe ne-tattoo ebonakalayo.
“Akubukeki kahle ukuthi iphoyisa libe ne-tattoo ngoba kuhlale njalo kulindeleke ukuthi libukeke kahle emphakathini,” kusho uNkk Molefe.
Uthe kona uyalweshwama lolu daba lukaConstable Sophazi, wengeza ngokuthi uzoxhumana nomele abasebenzi babo ePinetown ukuze athole ukuthi leli phoyisa kalisilo yini ilungu labo.
“Uma sesithola kahle yonke into sizobe sesikwazi ukuphawula kahle ngalolu daba,” kusho uNkk Molefe.
USihlalo weSouth African Police Union (Sapu) KwaZulu-Natal, uColonel Johannes Mncwango, naye uthe umgomo wamaphoyisa ucacile, uthi i-tattoo ebonakalayo ayifuneki.
“Uhlelo emaphoyiseni aqashwa manje luthi akumele abe ne-tattoo ebonakalayo kodwa kuthina ngesikhathi siqashwa kudala wawungekho lowo mgomo.”