Ikhehla (71) ligwazwe yinkomo lashona
ASALE ebambe ongezansi amanye amalungu omphakathi waseKwandeni, eHammarsdale, ngemuva kokuthi owesilisa oneminyaka engu-71 egwazwe yinkomo washona.
UMnuz Bhekumuzi Mabaso, ushone ngoMsombuluko kulandela ukuhlatshwa inkomo ngezimpondo washonela esibhedlela.
Isolezwe lithole ukuthi akukhona okokuqala le nkomo, umnikazi wayo owaziwayo endaweni, ihlasela abantu kodwa kuthiwa lesi yisigameko sokuqala ukuba ikhiphe isidumbu.
Isolezwe lithole ukuthi uMabaso kade ehamba nezinkomo zakhe, ezilanda emadlelweni ezihambisa ekhaya ngesikhathi kuqhamuka le nkomo yamhlasela. Ugwazeke esiswini nasentanyeni.
Elinye ilungu lomphakathi elingathandanga ukudalulwa lithe le nkomo ibisivele ihluphile kodwa okubamangazile ukuthi igcine isikhipha isidumbu. Leli lungu lithe balinganiselwa kwabayisithupha abantu asebehlaselwe yile nkomo, abanye bangeniswa ezibhedlela.
Okhulumela amaphoyisa KwaZulu-Natal, uLt Colonel Thulani Zwane, uthe: “Amaphoyisa aseMpumalanga avule idokodo kulandela ukushona kowesilisa oneminyaka engu-71 ogwazwe inkomo eKwandeni. Ubenenxeba esiswini nasentanyeni. Ushonele esibhedlela.”Isolezwe lithinte umndeni kaMabaso, owesilisa ozibize ngoMabaso, igama wangalisho, uthe ucela ukubuye athinte esenamalungu omndeni ngoba le ndaba inzima ukuba angakhuluma ngayo eyedwa kwazise uyisihlobo esikude nomufi.
Isolezwe selishaya ucingo ngesikhathi ebesishiwo uMabaso, owesifazane ozibise ngoNksz Sindi Mabaso uthe akukho azokukhuluma neSolezwe ngalolu daba ngoba bewumndeni abazi lutho ngalo, maqede wavala ucingo.
Kushayelwa ucingo owayeyikhansela kule ndawo, uMnuz Fani Moyo, uthe lolu daba lukhathazile emphakathini njengoba le nkomo iyinkathazo emphakathini.
Unxuse ukuba kuthintwe ikhansela eselibambe izintambo ku-ward 7 uMnuz Jabulani Phewa, uPhewa ulandulile ukuthi unolwazi ngale nkomo exakile emphakathini nokuthi sekuze kwaphuma isidumbu ngenxa yayo.
Ucele ukunikezwa ithuba akhulume nezinduna ngalolu daba. Isolezwe selishayela leli khansela ucingo belukhala lungabanjwa.
Isolezwe lithole nokuthi umnikazi wenkomo uyanqaba ukuba ibulawe noma iboshwe.
Imizamo yeSolezwe yokuthola umnikazi wenkomo ukuba aziphawulele ayizange iphumelele.
UMnuz Mlungisi Sibiya weSPCA eMgungundlovu uthe ikhambi lokuqeda udlame lwenkomo ukuba ibulawe ukuze kuzobhekwa ukuthi inawo yini amarabi.
“Isilwane esisuke sinodlame ngale ndlela sihlasela nabantu isikhathi esiningi sisuke sinamarabi. Indlela yokuhlolela isilwane amarabi ukuba sibulawe ngoba kusuke kuzothathwa ingxenye yobuchopho ihlolwe. Kulolu daba kuzomele bacele kumnikazi wenkomo ukuba ibulawe,” kweluleka uSibiya.