Kulimale umfundi itekisi ingena emzini womuntu
KULIMALE umfundi ngemuva kokuthi itekisi ebihamba abazalwane bakwaShembe iphaphalaze yayophoseka endlini yakwaMeyiwa Ovanzini, eNdwedwe yadilika.
Itekisi, esesegcekeni lakwaMeyiwa, ilimaze umfundi (8) waseTshelencwadi Primary ngeSonto ebusuku. Yize umfundi esephumile esibhedlela kodwa kuthiwa akakakwazi ukuya esikoleni ngoba ingalo yangakwesokudla ilimele akakwazi ukusebenzisa isandla
Kuthiwa umfundi noninakhulu bebelele kurawondi bavuswa yitekisi ebinamakholwa akwaShembe abephuma emhlanganweni eJudiya, isingaphakathi endlini. Abebesemotweni bese bekhala ubumayemaye.
UMnuz Nkosi Meyiwa, okhulumela umndeni, uthe akazi ukuthi abebengaphakathi basinde kanjani ngoba itekisi isishayise udonga engene ngakulo lwabhodloka yaze yama kolwesibili.
“Ngokuzwa kwethu imoto iphelelwe amabhuleki, umshayeli wahluleka ukuyilawula ejikeni, yaphaphalaza yangena ekhaya. Umama nezingane ezimbili bebelele ngaphakathi endlini. Kulezi zingane iyodwa elinyazwe yimoto, ishayeke ekhanda nasengalweni. Abanye bashaywe ngamagabade abedilika. Ngaphakathi etekisini bekunabantu, ngenhlanhla akekho oshonile yize belimele. Sibonga wona amandla oNyazi olubaphephisile,” kusho uMeyiwa.
Uthe itekisi eyenze ingozi ayikalandwa, isesegcekeni, akucaci ukuthi izolandwa nini. Umnikazi wayo wagcina ngokufika ngoMsombuluko ezobheka umonakalo.
Osesigungwini sokuphathwa kwegatsha leSiqalokuhle Taxi Association uthe ngeke aphawule kwabezindaba ngoba umnikazi wetekisi ubengakalubiki kusoseshini.
“Angifuni ukuthi ngibonakale sengiphawula kwabezindaba ekubeni umnikazi wetekisi engakasibikeli ngalo. Angithandi nokuthi kuze kubhalwe igama lami ephepheni. Angazi ukuthi ngubani obike lolu daba ephepheni, udaba olunje kumele luphathwe ngesinono ngoba lungadala inkinga ngizithole sengisobishini,” usho kanje.
Okhulumela amaphoyisa kulesi sifundazwe, uLt Thulani Zwane, uthe amaphoyisa aseNsuze abizwe endaweni yasOvanzini, eMvoti, lapho kwenzeke khona ingozi ngesikhathi itekisi iphaphalaza ingena komunye umuzi. Uthe abalimele kule ngozi baphuthunyiswe esibhedlela.