‘Ukukokotela ukhetho kunzima’
USIHLALO wekhomishini yokhetho i-Independent Electoral Commission (IEC) uMnuz Glen Mashinini uthe kunzima ukukokotela imiphumela yokhetho kuleli ngoba iqala yaziwe abamele amaqembu ezepolitiki kuqala.
Uthe abamele amaqembu yibo abaqale basayine beyiqinisekisa ngaphambi kokuba iyiswe kwiIEC.
“Kunzima kakhulu ukukokotela ukhetho kuleli. Kumele uqale enhlokohhovisi, uye ezifundeni nasezikhungweni zokuvota. Kusuke kukhona izingqapheli nalabo abamele amaqembu ahlukene, angiboni kungenzeka ukuthi bangavuma abamele amaqembu ukuthi bawinise iqembu elithile kungafanele,” kusho uMashinini.
Uthe abantu abangaphezu kuka-200 000 abazobe bephethe ukhetho kuzwelonke bebhekele iziteshi zokuvota ezingu-24 000.
Ukusho lokhu izolo ekhuluma nabaholi abahlukene bezamabandla iKwaZulu-Natal Christian Council eDiakonia Centre eThekwini.
UMashinini uthe uMengameli wezwe uMnuz Cyril Ramaphosa waveza ukuthi ukhetho luzoba ngoMeyi ngonyaka ozayo.
Uthe ngoMeyi 7 ngonyaka ozayo bazobe sebekulungele ukuthi babambe ukhetho.
“NgoJanuwari ngonyaka ozayo sizoba nomkhankaso wokugcina wokugqugquzela abantu ukuthi babhalisele ukuvota. UJanuwari umnqamulajuqu wokuthi amaqembu angenele ukhetho.”
Uthe uMashi inyanga lapho amaqembu kumele alethe abantu azobajuba esiShayamthetho sikazwelonke nasezifundazweni.
“Akuthina esikhetha ukuthi iqembu elithile lizoba kuphi kwiballot paper. Kuyatonyulwa kuthi elidonsiwe kube yilona elizoba phezulu.”
Unxuse ukuthi amabandla angenelele asize ukuze kube nokhetho olunokuphepha.
“Siyazi uma sekuzojutshwa abantu esiShayamthetho kuba nezinxushunxushu. Nemiphakathi ilapho ivele ivuse izinkinga ibhikishe yingakho kumele sibambisane.”
Abefundisi abehlukene bazibophezele ukuthi bazosebenzisana ne-IEC ukuze kube nokhetho olunokuthula.