Bagasele koweTheku abetoho bekhala
ABASEBENZI abayitoho ngaphansi kohlelo lwezokuphepha eMkhandlwini weTheku izolo bagasele eCity Hall bekhala ngokuthi abaholile.
Iqulu labasebenzi ebelithukuthele lithi sekuze kwaphela inyanga kodwa aliholeliwe.
Okhulumela laba basebenzi kodwa ocele ukuthi angadalulwa ngoba esaba ukuthi angase aphelelwe umsebenzi, uthe ngokujwayelekile bahola ngomhla ka 25 ngenyanga kodwa manje isize yaphela inyanga kodwa lutho umholo.
“Enye into esiphatha kabi ukuthi umholo wethu uyehliswa ube uvele ungekho, besihola R3 500 ngenyanga manje kuthiwa sesizohola uR3 100,” kusho lo msebenzi.
Uthe isizathu esenza ukuthi kwehliswe imali yabo inkohlakalo ekhona kumasipala.
“Kunabantu okuthiwa babheke ukusebenza kwethu, labo bantu asibazi nokuthi babukeka kanjani ebusweni kodwa baholelwa zonke izinyanga, enye into kuthiwa bahola ukwedlula thina,” kusho lo msebenzi.
Omunye umsebenzi naye ocele ukuthi angadalulwa, uthe esinye isizathu esidala ukuthi uhlelo lwabo lube nezinkinga ukuthi kunezipoki eziningi eziholelwayo.
“Mina ngihola ithimba esisebenza nalo ewadini yami ngazi ukuthi siwu-18 sesiphelele kodwa ngathola kwamasipala ukuthi kuthiwa siwu-54 ewadini yethu. Bonke laba abanye abantu mina angibazi kodwa kuthiwa bakhona nemali yabo iyaphuma zonke izinyanga,” kusho lo msebenzi.
Uthe umasipala ububathembisa ukuthi uzobakhokhela imali yezinyanga ezintathu obubakweleta yona ngo-Agasti kodwa kuze kube imanje abakayitholi.
“Umsebenzi wethu ubalulekile njengoba sibheke ukuphepha emawadini sisebenzisana namaphoyisa kodwa umkhandlu awusihloniphi,” kusho lo msebenzi.
UMnuz Mlungisi Ntombela oyisikhulu ehhovisi lemeya, uNkk Zandile Gumende, okunguye ophumile wakhuluma nalaba basebenzi, uthembise ukuthi izikhalo zabo uzozidlulisela ezikhulwini.