Kuboshwe obesefunwe iminyaka engu-11

INGALO yomthetho yinde futhi necala aliboli, lokhu kufakazelwe ukuboshwa kowesilisa obesefunwe iminyaka engu-11 ngamacala okubulala eDalton ngaphandle kwaseGreytown.

Owesilisa oneminyaka engu42 zimkhalele ebhace eZone 9 eMeadowlands, eGoli ngoMsombuluko.

Umsolwa ulindeleke ukuba avele okokuqala enkantolo yaseNew Hanover namhlanje ngecala lokubulala oMnuz Thembinkosi Ngubane (25) noScelo Mncube (23).

Okhulumela amaphoyisa KwaZulu-Natal, uLt Colonel Thulani Zwane, uthe maphoyisa aseDalton athole ulwazi ngokuti umsolwa esekuneminyaka bemfuna ubhace eGoli.

“Abaphenyi emuva kokuthola ulwazi lokuthi umsolwa ucashe kephi babe sebeya eGoli bafike bamthola babuya naye base bemethwesa amacala amabili okubulala enzeka ngo-2007.

“Umsolwa uzovela kusasa (namhlanje) enkantolo yaseNew Hanover,” kusho uZwane.

Ngokwecala elithwese umsolwa, kuthiwa ngoDisemba 5, 2007 emgwaqweni uMollisima khona eDalton wagasela endlini okwakukhona kuyo ababili besilisa, wafuna ukwazi ukuthi ikephi intombi yakhe.

Kuthe uma behluleka ukuchaza, wavulela ngenhlamvu wababulala, maqede wabaleka ngezinyawo endaweni yesigameko.

Lo msolwa kusukela lesi sigameko ubefunwa amaphoyisa ngecala kodwa elokhu ebaleka.

Amaphoyisa kuthiwa awazange ayeke ukuphenya leli cala njengoba egcine emtholile umsolwa.