Sitholakele isidumbu sowaduka
UTHOLAKALE eseyisidumbu owesifazane waseMlaza owanyamalala eyoqala umsebenzi eVerulam, okusolwa ukuthi washayiswa imoto. Isidumbu sikaNksz Welile Nomcebo Mhlungu (21), sitholakale emakhazeni kahulumeni ePhoenix emuva kokuba umndeni wakhe ubusumfune wancama kwezinye izindawo. Kusolwa ukuthi washayiswa yimoto njengoba isidumbu sakhe satholakala eduze komgwaqo ngasePhoenix.
Udadewabo kamufi uNksz Thandeka Mhlungu uthe bacele ezinye izihlobo ukuthi ziyobheka emakhazeni, kwatholakala isidumbu abasole ukuthi ngesakhe. “Kuthiwa wayesuke eMlazi ngabo 4.30 ekuseni ngoba bekuqhelile lapho esebenza khona. Abangani bakhe bathi nangosuku lokuqala emsebenzini wayekhala ngokuthi kuqhelile njengoba ebehlala kwaCC eMlazi,” kusho uNksz Mhlungu.
Izolo uninalume kamufi, uMnuz Thokozani Mhlungu, uye emakhazeni ukuyoqinisekisa ukuthi isidumbu ngesikamshana wakhe. Utshele Isolezwe ukuthi ngokombiko wasemakhazeni kuthiwa isidumbu satholakala eduze komgwaqo ngezithuba zabo- 7.30 ekuseni ngoOkthoba 15 okuwusuku anyamalala ngalo. UMhlungu uthe umbiko kadokotela uveza ukuthi washayiswa yimoto.
Kuthiwa umufi ubekade eqeqeshwa yinkampani elungisa amapayipi, yamtholela umsebenzi awuqale ngoOkthoba 12. Kuthiwa nabasemsebenzini babeshilo ukuthi bamgcina ngalo usuku ayeqale ngalo umsebenzi. Umndeni wakhe uthe uzomngcwabela khona Olundi ngeSonto. Amaphoyisa akuqinisekisile ukuthi umndeni usibhekile isidumbu. Kuvulwe icala lokubulala ngokungenhloso eliphenywa ngamaphoyisa asePhoenix.