IChiefs nePirates kumele bazibambe ziqine kwiTelkom
IYANCOMEKA indlela obe nesasasa ngawo umdlalo wabakhaya phakathi kwe-Orlando Pirates neKaizer Chiefs, nangendlela adlale ngayo amaqembu emdlalweni we-Absa Premiership ngoMgqibelo.
Bekuhlale kukhalwa ngokuthi isasasa selehlile ngalo mdlalo wabakhaya nokuyinto ebibangwa ukuthi amaqembu abesekujwayele ukudlala ngokulingana (ngo 0-0) kumasizini edlule. Kulokhu kube kuhle ukubona amagoli amathathu (iPirates iwine ngo 2-1) nokuthi amaqembu abengahleli emuva ekhombisa ukwesabana. Kucace ngokuthi amathikithi asheshe aphele ukuthi abalandeli bebezimisele ngokuzibonela zibulalana. Lokhu kufanele ukuthi kubagqugquzele abadlali bamaqembu womabili ukuthi bafike emdlalweni bezilungiselele, bazame ukunika abalandeli lokhu okubafanele.
Okuphawulekile futhi ukuthi ukuba sezingeni eliphezulu komdlalo kwenze abalandeli bajabula kodwa baziphatha kahle. Azikho izigameko ezibikiwe yize inkundla ibigcwele. Kuhlaluka ukuthi uma la maqembu edlala ibhola elibenelisayo abalandeli abasitholi isikhathi sokususa uthuthuva kungakhathalekile ukuthi umphumela ugcina uvune liphi iqembu. Njengoba kuzodlala imidlalo yeTelkom Knockout ngempelasonto akungabazeki ukuthi abalandeli bazothutheleka eMoses Mabhida Stadium ukuyobona iPirates ngoMgqibelo neChiefs ngeSonto. IBucs izobhekana naMaZulu, iChiefs idlale neSuperSport United.
Likhona ithuba lokuthi la maqembu adlulele phambili kulo mqhudelwano bese ephinde etholana phezulu. Uma kungenzeka aqhathwe womabili kuma-semi final eTelkom Kncokout, akukho nokuncane ukungabaza ukuthi kungaphinde kushunqe uthuli abalandeli babuke umdlalo omuhle njengoba kwenzeke ngoMgqibelo.
Okwamanje iPirates neChiefs kusamele bazibambe ziqine kwiTelkom baqinisekise ukuthi badlulela emzuliswaneni olandelayo. Ngemuva kwalokho sekungabhekwa-ke ukuthi amaqembu azoqhathwa kanjani njengoba kuzobe sekusele amane. Okubalulekile ngemidlalo yePirates neChiefs ukuthi abalandeli kufanele bahlale bejabule bangayikhaleli imali yabo abayisebenzisayo ukuya enkundleni.