Umyeni kadadewethu uyajola ngimcebe yini noma ngithule?
EZOTHANDO
UMBUZO: Eminyakeni emithathu edlule isoka lami okwakumele ngishade nalo langithumela iSMS ethi asimise umshado sekusele usuku olulodwa vo sishade. Langitshela ukuthi emva kokucabanga kahle libone ukuthi alikakakulungeli ukushada. Ngacishe ngafa ngalelo langa. Lapho izihlobo zase zifikile, wonke amalungiselelo omshado ayesemi ngomumo sesilindele usuku lomshado nje kuphela ngakusasa. Ngenyanga edlule ngibone ngalo selngithinta emva kweminyaka emithathu lithi liyangikhumbula, akekho omunye umuntu ongaba unkosikazi walo ngaphandle kwami. Ngivele ngaxakeka ngempela ukuthi isilingo esingaka ngizosithini. Lo muntu wabukisa ngami emphakathini. Ngaba yinhlekisa kubantu, namanje kusenzima ngisho ukubheka abanye abantu emehlweni ngenxa yento angenza yona. Uqala phansi manje ungitshela ukuthi usangithanda. Ngenzenjani ngempela? Igama ligodliwe
Impendulo: Alikho nelincane iphutha ekunqikazeni ukubuyelana nesoka lakho elidala. Phela ukumisa umshado sekusele usuku olulodwa akuyona into encane. Kubalulekile ukuthi uvikele inhliziyo yakho. Kubalulekile ukuthi uke umbhekisise kahle ngaphambi kokuthi ubuyelane naye uma kungukuthi usamthanda. Kumele ube nesiqiniseko sokuthi ngeke ayiphule inhliziyo yakho okwesibili. Awufuni ukuthi akuphindisele endaweni obuzitshela ukuthi usudlulile kuyo ngenxa yokuthi yena useyakufuna futhi. Mningi umsebenzi okumele awenze ukuze aphinde azuze inhliziyo yakho futhi.
Umbuzo: Ngenyanga edlule ngithole ukuthi umyeni kadadewethu omdala akathembekile emshadweni wabo. Ngithole ngokuthi intombazane esanda kuqala emsebenzini wami ingibonise isithombe somuntu esanda kuthandana naye. Ngicishe ngashayeka phansi uma ngibona isithombe sikamyeni kasisi wami kodwa angifunanga ukuthi abone ukuthuka kwami. Kade ingidla le ndaba angikwazi ngisho ukumbheka emehlweni usisi wami, angisayiphathi eyomyeni wakhe. Ngabe ngiyona uma ngitshela udadewethu ngengikutholile ngomyeni wakhe? Thulile, ePinetown Impendulo: Kuyinto engelula ukukhipha izindaba ezinkulu kangaka ngaphambi kokuba nesiqiniseko sokuthi ziyiqiniso ngempela. Sibona kubalulekile ukuthi ngaphambi kokukhuluma nosisi wakho uqale uhlale phansi nosisi osebenza naye ukwenza isiqiniseko sokuthi ngempela bayathandana nomyeni kasisi wakho futhi umazise nokuthi ushadile kodwa awukwazanga ukumtshela mhla ekubonisa isithombe ngoba wawusathukile. Emva kwalokho usungahlala phansi nomyeni kasisi wakho umazise ukuthi uyazi ngento ayenzayo futhi ungathanda ukuthi ayiyeke ngaphambi kokuthi ivele kusisi wakho. Kungumsebenzi wakho ukuvikela usisi wakho. Usisi wakho ungamtshela kuphela uma umyeni wakhe eqhubeka nalobu budlelwane noma usukhulumile naye ngoba kuzobe kuchaza ukuthi akazimisele ukuhlukana nentombazane. Umbuzo: Ngingumakoti osemncane. Nginenkinga kamama ofuna ukungena kuzo zonke izindaba zomuzi wami. Alipheli isonto engafikanga emzini wami, uze angitshele nokuthi ngenzeni, nini. Noma engasho lutho umyeni wami kodwa ngiyabona ukuthi akayithandi le nto eyenziwa ngumama. Ngingamtshela kanjani umama ukuthi angiyithandi le nto ayenzayo ngaphandle kokumphatha kabi? Okhathazekile, eThekwini Impendulo: Kuyinto ejwayelekile ukuthi omama benze ngale ndlela umama wakho enza ngayo. Kungakuhle kube nguwe okhulumisana naye ngoba awufuni acabange ukuthi ngumyeni wakho ongamfuni. Kuhle uqale ngokumazisa ngendlela abaluleke ngayo empilweni yenu, nangendlela omthanda ngayo njengomzali. Kubalulekile ukuthi noma usushadile kodwa umzali azi indlela abaluleke ngayo empilweni yakho, okungasho ukuthi kumele ahambe phambili ukudlula umyeni wakho. Uma ushadile umyeni nguye othatha indawo yokuqala empilweni yakho. Kubalulekile ukuthi naye akubone lokho ngezenzo zakho. Umama mazise ukuthi njengoba usushadile ungathanda ukuba nethuba lokuthi nifundane kahle nomyeni, okungeke kwenzeke kahle uma ezoloku ekutshela ukuthi wenzeni emshadweni wenu. Mqinisekise ukuthi uma kukhona la odinga khona usizo uzoba umuntu wokuqala ozomthinta ukuze azibone esabalulekile empilweni yakho. Futhi lokhu kuzokusiza ukwazi nokusebenzisa zonke izinto ayekufundise zona ngaphambi kokuthi ushade.