Bazimisele ukusiza abafundi ngolwazi
ABAFUNDI abaqokelwe ukuyocobelelana nabanye ngolwazi eGermany bazimisele ukubuya nolwazi oluzosiza abafundi ngezinkinga ababhekene nazo ezikoleni zabo.
Abafundi abane abavela ezikoleni ezehlukene KwaZuluNatal bangamaPeer Educator ohlelweni lokulekelela abanye abanezinkinga. Uhlelo lwaqalwa yinhlangano iYouth For Christ (YFC) esebenzisana nabaxhasi baseGermany.
Omunye wabafundi abaqokiwe, uMakhosi Mngoma (16), ofunda uGrade 10 eDumehlezi High, eNtuzuma, uthe wangena ohlelweni lwePeer Education ngo-Ephreli. Umsebenzi wabo wukubheka izinkinga ezikhungethe ontanga esikoleni bese benza imikhankaso yokuqwashisa ngazo.
“Umsebenzi wethu wukusiza noma iyiphi ingane enenkinga esikoleni. Nazo ziyazi ukuthi uma zinenkinga ziqala kithina. Inkinga esibhekene nayo kakhulu wukukhulelwa kwabafundi, wukusetshenziswa kwezidakamizwa nokungahloniphi othisha,” kusho uNksz Mngoma.
Uthe bathole ukuthi izingane ziyakhululeka uma zikhuluma nontanga, yingakho nabo bekwazi ukuzilekelela. NgoJulayi uMakhosi ukhethwe nabanye abafundi bezinye izikole ukuthi ayocobelelana nabanye eGermany. Uthe uzimisele ukucosha ulwazi afundise ngalo ontanga uma ebuya. Uzohamba ngoLwesihlanu nethimba lakhe. Usehlele ukuthi ezinye izifundo azibhala esebuya eGermany. Kuqokwe nabafundi baseMvaba High noMqhawe High eNanda.
Owengamele uhlelo kwiYFC, uNkk Sane Shandu, uthe baluqala ngo-2010 uhlelo lwamaPeer Educator emuva kokusebenza nezikole kwezinye izinhlelo. Bebeya ezikoleni beyoluleka abafundi, babona ukuthi akwanele ngoba abakwazi ukuhlala bekhona.
“Sibone kungcono ukuthi kube khona abafundi abazokwazi ukusiza usuku nosuku. Sixhumana nabo basitshele ukuthi yiziphi izinkinga ezinkulu abazithola kubafundi, bese sihlela nabo imikhankaso yokuqwashisa ngazo. Sibuye sisebenze nomphakathi ukuqinisa imikhankaso,” kusho uNkk Shandu.
Baqale ngonyaka odlule ukuhambisa abafundi eGermany. Bahlela ukuthi abafundi baseGermany beze eNingizimu Afrika. Abafundi bazobuyela kuleli ngoNovemba 16.