Senyukile esabansundu abanikela ngegazi
INHLANGANO eqoqa igazi iSouth African National Blood Services (SANBS) ithi ukwenyuka komthamo wegazi elinikelwa ngabantu abamnyama kwenza umehluko omkhulu.
Le nhlangano isanda kuveza ukuthi seyikwaze ukunyusa umthamo wegazi labantu abamnyama elingasetshenziselwa ukunikelela abanye, yakwazi nokwenza igazi liphephe.
Babheke izibalo zabantu abanikele kusuka ngo-2005 kuya ku-2015 besebenzisana nophiko lweMedical Virology esikhungweni semfundo ephakeme iStellenbosch University nophiko olwaziwa ngeCentre of Excellence for Epidemiological Modelling and Analysis (SACEMA) lapho bethole ukuthi isibalo senani legazi ebelinikelwa abamnyama ebesisetshenziswa besingu-43 269 ngo-2005 kodwa sinyuke safinyelela ku-246 686 ngo-2015.
UNkk Marion Vermeulen weSANBS uthe okunye abakutholile ukuthi kusona lesi sikhathi abebesibheka libe lincane igazi elitholakale linegciwane lengculazi futhi sisodwa isigameko somuntu othole leli gciwane ngokunikelelwa igazi.
Ngokusho kwabo ngaphambi kuka-2005 igazi labantu abamnyama belingavamile ukusebenza ngenxa yamazinga aphezulu egciwane lengculazi.
Ngo-2005, le nhlangano ibe ngeyokuqala ukuthi isebenzise uhlelo lokuhlola oluyisipesheli lokuhlola izifo ezitholakala egazini okubalwa kuzo igciwane lengculazi.
Bathe emuva kokufakwa kwalolu hlelo kunyuke umthamo wegazi elinikelwe abantu abamnyama uma kuqhathaniswa naphambilini. Ngokusho kwabo abantu abanikela okokuqala abamnyama basuke ku-19% bafinyelela ku-54% ngo-2015. UNkk Vermeulen uthe noma sinyukile isibalo sabamnyama abanikelayo basadinga abanye abantu.
Kusanda kuvela imibiko yokuthi uMnyango wezeMpilo kulesi sifundazwe ufake abazali bengane eneminyaka emihlanu enkantolo ngoba bengafuni ukuthi inikelelwe ngegazi yize inesifo segazi esenza idinge ukunikelelwa.
UMnuz Sifiso Khoza okhulumela abakwaSANBS uthe kuningi okwenza abantu ukuthi banganikeli.
Uthe abanye abantu basaba izinaliti, abanye bakhala ngokuthi bamatasa kakhulu. Abanye benziwa ukuthi bayaquleka uma benikela, abanye babeka izizathu ezithinta inkolo.
UKhoza uthe bayalihlonipha ilungelo labantu lokuthi banikele nokuthi bafakele igazi uma kunesidingo.