Imishanguzo elwa neHIV ayinankinga:ucwaningo
UCWANINGO lwakwamuva luveza ukuthi imishanguzo esetshenziselwa ukuvikela igciwane lengculazi, ipre-exposure prophylaxis (PrEP) inganikwa abantu abaningi ngaphandle kokuthi babe nezinkinga ngesikhathi bethatha imishanguzo.
Lolu cwaningo olwethulwe engqungqutheleni ebiseGlasgow, eScotland iHIV Drug Therapy Conference ngoLwesibili, luveze ukuthi cishe abantu abayisigidi emhlabeni wonke bangakwazi ukunikwa iPrEP.
Le mishanguzo iyinhlanganisela yama-ARV, i-tenofovir disoproxil fumarate (TDF) and emtricitabine (FTC) ivame ukusetshenziselwa ukuthithibalisa igciwane lengculazi.
Abacwaningi benze ucwaningo ngabantu abangu-15,678 kubantu abebesengozini yokuthola igciwane lengculazi.
Bathole ukuthi labo abebethatha le mishanguzo bebengakhombisi imiphumela exhantele, okubalwa kuyo ukulimala kwamathambo, izinkinga zezinso nokunye okwedlula abebenikwa iphilisi elingenalutho.
Kukholakala ukuthi bangu-7.5 million abantu abanegciwane lengculazi eNingizimu Afrika kulo nyaka. INingizimu Afrika ingelinye lamazwe aphasise ukusetshenziswa kwePrEP. Kodwa le mishanguzo ingathengwa yinoma ubani ekhemisi kodwa uhulumeni usahlinzeka abantu abadayisa umzimba nabanye abayingxenye yocwaningo olwahlukene olusenziwa ngayo.
Ngokusho kukamengameli we-International AIDS Society, uDkt Anton Pozniak, ucwaningo olwahlukene selukuvezile ukuthi abantu besilisa abalala nabanye abantu besilisa basengozini yokuthola igciwane lengculazi.
Uthe balinganiselwa ku-300 000 kuphela abantu abathatha iPrEP emhlabeni wonkana, babe ngu-1.8 million abantu abangenwa yigciwane lengculazi.
Uthe ukuze kube nendlela ezokwenza ukuthi kuliwe nokusabalala kwegciwane lengculazi, kuzobaluleka ukuthi sandiswe isibalo sabantu abathola le mishanguzo.
UDkt Tom Ellman ongumqondisi weMédecins Sans Frontières/Doctors Without Borders (MSF) eSouthern Africa, uthe kuyiqiniso ukuthi iPrEP iyadingeka nokuthi ibalulekile ezinhlelweni zokulwa nokusabalala kwegciwane lengculazi.
Uthe okuzobaluleka ukuqinisekisa ukuthi inikwa abantu abayidingayo nabazokwazi ukuyithatha ngendlela. Uthe leli philisi lingasiza nakubantu besifazane abanenkinga yokucindezela ophathina babo ngokusetshenziswa kwamakhondomu.
Uqhube wathi kubalulekile nokuthi abantu basekwe, bafundiswe ngendlela yokuthatha le mishanguzo nokuthi bayithole ngaso sonke isikhathi.