URhoda ubingelele ngegoli kwiCanberra
UMGADLI waseNingizimu Afrika, uRhoda Mulaudzi ubingelele ngegoli eqenjini lakhe lase-Australia iCanberra United elidlala kwiligi enkulu yabesifazane kuleliya lizwe.
UMulaudzi obegijima eqenjini leMamelodi Sundowns labesifazane kwiSasol League, usayiniswe yi-United nomdlali weBanyana Banyana uRefiloe Jane ngenyanga edlule.
Akagcinanga ngokushaya igoli lokuqala aliphaselwe uJane oyibamba esiswini kodwa uyena ophake ibhola elize nelesibili beshaya iMelbourne City ngo 2-0.
Ukusayiniswa kwabo yiqembu laphesheya kwashayelwa ihlombe njengoba kuthathwa njengokuzokhulisa iBanyana.
Balandele kuLinda Motlhalo noThembi Kgatlana abangabadlali beHouston Dash e-USA. Ukaputeni weBanyana uJanine van Wyk usanda kushiya kwiHouston Dash ngemuva kweminyaka emibili kuyona. UMulaudzi ekhuluma nabezindaba ngemuva komdlalo kwi-video efakwe ekhasini leqembu, uthe: “Benginovalo ngesikhathi ngingena (enkundleni) kodwa ngazitshela ukuthi ngiwumgadli, umsebenzi wami ukushaya amagoli. Ngizolisebenzisa ithuba engilitholayo. Ngisengenza okungcono kodwa ngijabule ngoba bekuwumdlalo wami wokuqala futhi besidlala nompetha abavikela isicoco.”
Uqhube wathi uyazibona eba ngumgadli ovelele kule ligi. “Kungenzeka. Okumele ngikwenze ukuthi ngisebenze kanzima ekuzicijeni ekuqeleni amathuba.”
Omunye umdlali weBanyana ogila izimanga phesheya u-Ode Fulutudilu odlala eFinland kwiNaiset.
Khonamanjalo kulindeleke ukuthi ngesonto elizayo umqeqeshi weBanyana amemezele abadlali abawu-21 azoya nabo kwiWomen Africa Cup of Nations eqala eGhana ngoNovemba 18. UMuluadzi, uJane noFulutudile abekho ekhempini yeBanyana eseGoli eqale ngesonto eledlule.
Elakuleli lizovula umqhudelwano neNigeria. Eqoqweni kukhona neKenya neZambia.
IBanyana idinga ukuqeda ibalwa namaqembu amathathu aphezulu ukuze iye kwiNdebe yoMhlaba eFrance ngonyaka ozayo.