UKatsande ubuyela ekhaya kwelesizwe
BAGCINE bemxolele abaqeqeshi beqembu lesizwe laseZimbabwe uWillard Katsande, owayezidingise yena kwiWarriors emuva kokushaya kwayo udaka iholwa uyena engukaputeni kwi-Africa Cup of Nations ebiseGabon ngo2017.
Lokhu kucaciswe ukumenyezelwa kwakhe lo mdlali weKaizer Chiefs esikwatini sabadlali abawu-23 abazoya eLiberia lapho iZimbabwe imelwe khona, okungenani ukuthola iphuzu elilodwa ukuze izifake kwi-Afcon ezokuba seCameroon, ngonyaka ozayo.
UKatsande, othe uzizwa ehloniphekile njengoba esezokwazi ukufeza iphupho likanina ongasekho, kulindeleke ukuthi kube neqhaza alibambayo ngoNovemba 18 emdlalweni kaGroup G oseSamuel Kanyon Doe Stadium.
Bekunguyena uKatsande ukaputeni weZimbabwe ngesikhathi ishaya udaka eGabon, ngaphansi kobuholi bomqeqeshi uCallisto Pasuwa. Ngemuva kokukhishwa kwi-Afcon uKatsande uthathe umhlalaphansi ebholeni lomhlaba yize bekukhona abadlali abaningi abadala baseZimbabwe abebemkhuza ngokuthatha isinqumo ngenhliziyo.
Ugcine ewujikile umqondo esikhathini esingangonyaka wamemezela ukuthi uyakuhoxisa ukuzidingisa kwakhe. Kodwa uSunday Chidzambiwa nethimba lakhe bebelokhu bemziba ngisho edlala kahle kwiChiefs, ehlale eyihola njengesibani.
Ngenxa yokubona ukubaluleka kwabaholi eqenjini lakhe kuthiwa uChidzambwa umxolele uKatsande ambizele esikwatini.
Ekhuluma nephephandaba lezemidlalo laseZimbabwe ngemuva kokuzwa ukuthi ubuyele eqenjini, uKatsande uthe: “Ngizizwa ngihlonipheke kakhulu. Kuyisibusiso ukudlalela izwe lami. Okungijabulisa kakhulu ukuthi nephupho likamama wami ongasekho lizofezeka kwazise ubehlale engitshela ukuthi kubukeka sengathi kukhona okungahlangani kahle, uma ebuka iqembu lesizwe ingekho indodana yakhe.”
Ukulimala kukaDanny Phiri emdlalweni odlule weZimbabwe kungenzeka ukuthi kube nomthelela ekutheni uChidzambiwa abuyise lesi siqongqwane sesisu.
“UKatsande ubizelwe esikwatini kodwa angifuni ukugxila kuyena yedwa ngoba iqembu yiqembu ngabo bonke abadlali abakhona. UPhiri akekho ngakho-ke kuphoqile ukuthi senze izinguquko,” usho kanje uChidzambiwa ephephandabeni.