I-BSA ivune uSibiya kweyakhe noMpontshane
UKOOS “The Last Great Warrior” Sibiya, ovunwe yisinqumo seBoxing South Africa (BSA) sokuthi impi yakhe noPhila Mpontshane ibuyele eringini, ukhuthazwe ngabantu esenqume ukushiya phansi isibhakela .
USibiya ushayelwe esakeni ngoJulayi empini yebhande le-SA Super Featherweight nompetha uMpontshane e-Orient Theatre, e-East London. Ngemuva kwempi cishe zonke izibukeli bezizitshela ukuthi liyahamba ibhande likaMpontshane kodwa amajaji amwinisa. USibiya umangele kwiBSA esinqume ukuthi impi ibuyele eringini emuva kokuthi amajaji azimele aqokwe ukuthi ayibhekisise ebone yena njengobekufanele agoduke nebhande.
Ngaphezu kwalokho amajaji amathathu ayephethe impi azobhekana nolaka lweBSA.
USibiya uthe ujabule ngesinqumo seBSA noma kukade kukhona abebengayizwa eyokuthi impi iphindwe.
“Ngibonga uMdali ngakho konke. Ngesikhathi simangala kwiBSA ithathe isikhathi sayo. Kukhona abebephikisana nokuthi impi ibuyekezwe kodwa yagcina itholakele ivideo yayo. Ngiyajabula ukuthi iBSA ibenzile ubulungiswa. Ngayiwina impi ngendlela egculisayo kodwa amajaji azenzela okwawo,” kusho uSibiya.
“Kade sengithathe isinqumo sokusiyeka isibhakela ngenxa yale nto kodwa abantu bangibonisa ukuthi ngibuye ngiqhubeke. Bengizibuza izinto eziningi ukuthi kuyoba nini sisebenza kanzima kodwa kuphume izinqumo ezifana nalesi. Abantu abehlukene bakhulumile nami ngagcina ngisihoxisile isinqumo sami.”
Kuyinto eyaziwayo esibhakeleni saseNingizimu Afrika ukuthi abenzeki ubulungiswa uma ibhokisa lase-East London libhekene nelakwesinye isifundazwe kule ndawo. Lesi yisikhalo seminyaka kodwa iBSA kade ingenzi lutho ngaso.
Ngo-2015 uSibiya uphume e-East London ekhihla esikaNandi emuva kokulwa noMzonke “The Rose of Khayelitsha” Fana empini asakholwa wukuthi wayeyiwinile.
“Uma le nto singayivimbi manje kuzoba njani ezizukulwaneni ezizolandela. Akufanele esibhakeleni amabhokisa angabi namathuba alinganayo okuwina impi. Kungaba wumngqimuzo womlalisa phansi noma ngamaphuzu. Empini eyimpinda ngizoqonda kuye zibekwa,” kuhso uSibiya.
Ngesonto eledlule, uMpontshane uvikele ngempumelelo ibhande lakhe ku-Anthony Moloisane waseFree State empini ebikade iseEast London. Uwine ngamaphuzu.