Unina wezelamani ezibulawe nabazukulu usadidekile
USAPHITHENE ikhada unina wezelamani ezintathu zaseCaluza, eMgungundlovu, ezibulewe nabazukulu abane ngempelasonto eVlakfontein, eGoli ngempelasonto.
UNkk Thoko Khoza ongunina kaNksz Mbali, Dudu noNomfundo Khoza ugcine ukukhuluma nenye yamadodakazi akhe ngesikhathi elungiselela ukuya enkonzweni ngoMgqibelo. Lawa madodakazi akhe abulawe nabazukulu abane bakaNkk Khoza okunguKarabo, Luyanda, Sibongakonke noNkanyiso base begqitshwa endlini nokusolwa obeyisihlobo ebesizenza udokotela ngokubabulala.
UNkk Khoza uthe wasola ukuthi kukhona okungahambi kahle ngesikhathi eshayela izingane zakhe ucingo kodwa zingazibambi izingcingo. UNkk Khoza uthi uvalo luqale ukumshaya uma engamtholi uMbali kwiselula ngeSonto ekuseni ekubeni ubengalenzi iphutha lokuhamba engamthintanga.
“Uvuka kakhulu ekuseni bese siyakhuluma ocingweni. Kodwa ngashaya ucingo isikhathi eside ngingamtholi ucingo luvaliwe. Kukhona engakusola kodwa ngalokhu ngizama ngaze ngashayela uDudu ucingo lwabanjwa yilo mfana ebusuku wathi sebelele bonke uzobatshela ukuthi bengishayela. Ngamangala ngambuza ukuthi yena akalele ngani, wathi usabhala amaphepha omsebenzi asesibhedlela ngoba besazi ukuthi udokotela. Ngisadidekile angisakwazi nakahle okunye,” kusho uNkk Khoza.
IMeya yaseMsunduzi uMnuz Themba Njilo ivakashele amalungu alo mndeni izolo. UNjilo uthe umasipala uzobambisana noMnyango wezokuThuthukiswa koMphakathi, owezokuThutha, ukuPhepha nokuXhunyaniswa koMphakathi KwaZulu-Natal nowaseGoli ngamalungiselelo okufihla.
“UNgqongqoshe waseGoli usesilekelele ngokuthuthwa kwezidumbu, namalungiselelo omngcwabo sesiqalile ukuwenza nomndeni. Sizowulekelela ngakho konke esingasiza ngakho ngoba nogogo siyabona usesele yedwa,” kusho uNjilo. Inkonzo yomngcwabo izoba sehholo lomphakathi eCaluza ngeSonto ngo-9 ekuseni.
Okhulumela amaphoyisa aseGoli uCaptain Mavela Masondo utshele Isolezwe ukuthi basezithendeni zosolwa ngokubulala lawa malungu omndeni.
“Amaphoyisa aseLenasia South aphenya amacala ayisikhombisa okubulala kulandela ukutholwa kwezidumbu zabo endlini abebehlala kuyo. Ukhona obethathwe amaphoyisa obehlala kulo muzi ukuze aphoswe imibuzo kodwa wabuya wadedelwa ngoba singakutholi okumhlanganisa namacala. Umsolwa akakaboshwa kodwa silandela umkhondo wakhe. Sinxusa nomphakathi ukuba usilekelele ngolwazi ongaba nalo, uthinte noma yisiphi isiteshi samaphoyisa,” kusho uMasondo.
Izidumbu zalaba zitholwe ngoMsombuluko zigqitshwe endlini ngemuva kokuthi abanye abahlala egcekeni lalo muzi bezwe kunephunga elingajwayeleike futhi bengawaboni amalungu alo mndeni.