Bashaya amakhala ngokuthiwa uboshwe wase ededelwa
UMNDENI wentombazane (10) yaKwaMaphumulo ushaya amakhala ngendoda ewumakhelwane okuthiwa idlwengule indodakazi yawo yaboshwa kodwa yabuye yadedelwa.
Unina womgilwa, igama lakhe elingeke lidalulwe, uthe basaba ukuthi indoda ingabahlasela noma yinini kodwa kabazi ukuthi bazocasha kuphi. Indodakazi yakhe uthe idlwengulwe ngoMgqibelo, ngeSonto ekuseni bavuka bayovula icala esiteshini samaphoyisa KwaMaphumulo.
Uthe indodakazi yakhe yabonakala iphuma endlini yendoda bathi uma belandelela bathola ukuthi ubeyindlwengula.
“Ngathola ukuthi indodakazi yami ijwayele ukuya kule ndlu uma ngingekho ayithume amanzi bese eyinikeza uR2, ayidlwengule. Uma siyibheka sathola ukuthi ngempela ingane ihlukumezekile. Sivuke ngeSonto saya esiteshini samaphoyisa KwaMaphumulo, basiphuthumise esibhedlela lapho ifike yahlolwa khona udokotela, waqinisekisa ukuthi ihlukumezekile. Sibe sesivulelwa icala. Amaphoyisa asitshele ukuthi uma sesibuyela ekhaya simbona umsolwa asowathinta ukuze ambophe. Nangempela ngo-8 ebusuku sishayile amaphoyisa akhala ngeveni. Ngabo-11 aphinde asithinta esefuna siwayalele. Sivuke sawakhombisa umsolwa, amfaka evenini ahamba naye,” kusho unina wengane.
Uthe ushaqekile esethintwa wumphenyi wecala ngoMsombuluko ebuza umsolwa.
“Kungimangazile ukuthi umbuza kanjani umsolwa ngoba wayeboshwe ebusuku ngeSonto. Uma sesiya esiteshini satshelwa ukuthi emafayeleni abo akukho siboshwa esifike namaphoyisa. Sibe sesicela incazelo basitshela ukuthi amaphoyisa abesebenza avale amaselula awaziwa. Lokhu kuyasithusa kakhulu ngoba asazi ukuthi uphi umsolwa nokuthi uzosihlasela yini ukuqeda icala,” kusho unina wengane.Okhulumela amaphoyisa KwaZuluNatal, uLt Colonel Thulani Zwane, uthe amaphoyisa aKwaMaphumulo aphenya icala lokudlwengula.