Badinda isililo abashaywe yingidi emahhovisi ebhanoyi
BAKHIHLA esikaNandi abantu baseMsinga naseDundee abagilwe yibhanoyi elibizwa ngeForex For Africa abathi liphahlazeke nemali abebeyitshale kulo.
NgoLwesithathu bafike itshe lome inhlama emahhovisi ebhanoyi angasesiteshini samaphoyisa eDundee, kulenga ingidi. Abantu bafika kuvaliwe nje, bebethi bayolanda imali enenzuzo, abanye besayofaka.
“Bengithi ngizofaka uR5 000 ebengiwuthole ngenzuzo kaR2 500 ebengiwufake ezinsukwini ezingu-10 ezedlule. Ngifice abantu esangweni beshayana ngamakhanda. Abanye bebekhala bebalisa ngokuhamba kwemali yezingane zabo abebeyoyikhulisa,” kusho owesifazane ocele ukungadalulwa.
Uthe yena ubesukela eMsinga esebuya okwesibili ngemuva kokuba imali ayifaka edayise izimbuzi ikhule ngendlela eyisimanga.
Uthisha wakwaStoks, eSibongile naye ogilekile, uthe ubefake imali abeyiboleke kumashonisa ngoba enethemba lokuthi izobuya isiphindiwe.
“Angazi noma ngizomelwa yinhliziyo yini ngoba bengithemba ukuthi imali enguR18 000 ebengiyifakile izobuya ngemuva kwamasonto amabili isibalelwa koR50 000. Angazi ngizothini emndenini wami. Siyile emaphoyiseni kodwa asitshela ukuthi alikho icala azolivula. Ngivele ngahamba ngoba nomfana obeboshiwe kuthiwe uzodedelwa ngoba uthi yena ubeqashiwe, akazi lutho,” kusho uthisha othe akathandi ukudalulwa ngoba uzoba yinhlekisa.
Uthe okwenze wathemba ukuthi ibhanoyi liyinto esemthethweni wukuthi nabaholi abahlonishwayo abakomasipala ubebabona bezofaka.
Ngisho abahlengikazi namaphoyisa kuthiwa bebengena bededelana beyofaka imali.
Abasindile kuthiwa abangene leli bhanoyi lisafika.
“Ngendlela obekugcwala ngayo emahhovisi ebhanoyi, abantu bese bebamba olayini ngemali ebiqala kuR100 kuya phezulu. Abanye bayitholile imali kodwa abanye bayibuyisele befuna ikhule,” kusho omunye umgilwa.
Ngokuthola kweSolezwe bekunohlelo lokutshala imali izinsuku ezingu-10 nelezinsuku ezingu-20.
Uma ufake uR1 250 emuva kwezinsuku ezingu-10 ubuthola uR2 500, uR2 400 emuva kwezinsuku ezingu-10 ububa uR5 000 njalonjalo. Uma ufake uR1 520 ohlelweni lezinsuku ezingu-20 ubuthola uR5000.
Abebetshale imali yabo Isolezwe lithole ukuthi baphuthume baya esiteshini saseDundee kodwa bathe amaphoyisa athe ngeke akwazi ukubavulela icala ngoba imali bayifake ngokuthanda bengaphoqiwe ngakho alikho icala abangalivula.
Isolezwe lizamile ukulandela inkampani ezinkundleni zokuxhumana nokuthi ngabe ibhalisiwe yini. Akukho obekuvela ngaphansi kwaleli gama.
Iphepha ebelinikezwa abatshala imali belingenazo izinombolo zocingo lwenkampani noma ikheli elikhomba ukuthi basebenzela kuphi, kukhona igama lenkampani nesiqubulo esithi: Financial Freedom.
Okhulumela amaphoyisa KwaZulu-Natal uLt Colonel Thulani Zwane uthe kuvulwe icala lokukhwabanisa.
“Kunowesilisa osathathwe amaphoyisa ukuze ezophendula imibuzo. Uphenyo lwamaphoyisa lusaqhubeka,” kusho uZwane.