U-1.2 million ungase ungavoti KwaZulu-Natal: Mosery
BASENGOZINI yokungavoti abantu ababalelwa ku-1.2 million KwaZuluNatal abangenawo amakheli nalabo abanamakheli angaphelele kwi-voters roll.
Isexwayiso sikhishwe yisikhulu sekhomishini yezokhetho esifundazweni, uMnuz Mawethu Mosery, othe kulaba abawu-822 000 banamakheli angaphelele kanti abawu320 000 kabananawo nhlobo amakheli.
UMosery uthe uma begcina bengafikanga ukuzofaka amakheli amasha bangagcina sebekhishiwe kwivoters roll.
“Yingakho kubalulekile ukuthi abantu bahambe bayobheka ukuthi akhona amakheli abo emqulwini wokuvota. U-320 000 wabavoti usho izihlalo eziyisithupha esiShayamthetho sesifundazwe,” kusho uMosery.
Uthe bawu-26 million abantu abasemqulwini wokuvota wathi u-16 million wabo, ophakathi kuka-40 no-69, yibona abaningi kakhulu. Kuhlale kukhulunywa ngentsha ukuthi kubhekwe yona kakhulu ukuthi ivote.
Abanye abaningi abavotayo abaphakathi kuka-70 no-79 ababalelwa ku-1.5 million. Abano-80 kuya phezulu bangu-800 000.
Uthe amaqembu ezepolitiki afuna ukuwina ukhetho kuzwelonke ngokuthola ngaphezulu kuka-50% kumele agxile ezifundazweni ezintathu ezinabavoti abaningi.
“IGauteng iyona enabavoti abaningi abawu-6.2, kulandele iKZN ngo-5.3 million bese kuba yi-Eastern Cape ngo-3.3 million. Uma ufuna ukuwina ukhetho kumele ugxile kulezi zifundazwe.”
Uthe iWestern Cape inabavoti abangu-3 million, kulandele iLimpopo ngo-2.5 million ezinye zinabangaphansi kuka-2 million.
“Nakhu okunye okumele amaqembu akwenze ukuze awine ukhetho wukugxila kwabesifazane ngoba yibona abavotayo. Bawu-56% abantu besifazane abavotayo abesilisa babalewa ku-43%.”
Uthe iziboshwa nabahlala kwamanye amazwe bazovota okhethweni lwangonyaka ozayo okulindeleke ukuthi lube ngoMeyi. Abahlala kwamanye amazwe bazovotela ezindlini zamanxusa.
Uthe abantu basengaqhubeka babhalise amaqembu amasha ezepolitiki kuze kube uJanuwari ngonyaka ozayo.