Yinto encane kabi ejabulisa indoda kumuntu wesifazane
AKUKHATHALEKI ukuthi umuntu uyasithanda noma akasithandi isidalwa esiyindoda kodwa iqiniso elimile eliwukuthi indoda ikhona yabekwa wuNkulunkulu emhlabeni.
Kuyiqiniso elimsulwa ukuthi sekubhalwe imiqingo yezincwadi kuzanywa ukuchaza ukuthi indoda iyisilwane esinjani.
Kuyo yonke incazelo esike yachazwa ngendoda ayikho esingathi ingujikelele, ichaza konke ngendoda.
Kuyimanje sikhuluma nje abantu besifazane basakhihla isililo bathi indoda ingumadida othushuka lapho bengayilindele khona.
MaSolezwe, ngalesi sendlalelo ngizama ukunikeza isithombe sokuthi akukho okusha okungachazwa ngesidalwa esiyindoda kodwa kufanele siqhubeke nokuchaza ngoba nabefundisi abayeki ukushumayeza abantu ngeBhayibheli yize bethi sebeyalazi.
Bantu besifazane ngivumeleni ngiqale inkulumo yami ngokuthi ngiyazi futhi ngiyaqonda ukuthi kunabantu besifazane abangenandaba nokujabula nokudangala komuntu oyindoda.
Ngiyafisa ukusho ukuthi akudingi uze ujule kakhulu uma ufuna ukujabulisa indoda ngoba amadoda isidalo sawo ajatshuliswa yizinto ezincane.
Kulabo bantu besifazane abasasibona isidingo sokuthi kufanele indoda ithokoziswe ngicela bawathathe la mathiphu engibanikeza wona ngoba ayobasiza.
Okokuqala okubaluleke kunakho konke wukuthi abantu besifazane kufanele baqonde ukuthi umqondo wendoda usebenza kanjani ukuze bakwazi ukuyilawula.
Selokhu kwadabuka umhlaba isidalwa esiyindoda asiyithandi into ehlangene, uma upha indoda into ethile kufanele uyicaze uyenze izicucwana.
Uma upha indoda ukudla kufanele ukugweme ukuthi uyinikeze usukuhlanganisile, kuwubuhlakani ukuthi ukudla ukwehlukanise kugcwale ithileyi.
Umthetho wamadoda ayakuthanda ukubusa, uma uwanikeza ukudla kungamacozucozu amaningi kuwenza azizwe sengathi ayabusa.
Uma ufuna ukujabulisa indoda ngokudla akusho ukuthi uyoze upheke izishebo ezidulayo, indoda ijatshuliswa wukuthi uphake isishebo sihambe sodwa nophuthu luhambe lodwa nesobho eceleni.
Uma usufuna ukukhipha unyawo ungaze ubeke nengilazi enamanzi okuxubha nemfaduko yokwesula izandla.
Manenekazi, mlaleleni uVolos uma ethi ngisho ukwenzela indoda itiye akufanele nikwenze kube yinto elula.
Uma wenzela indoda itiye akufanele ulihlanganise, kufanele ube yiciko ngokuthi itiye ulihlukanise; amanzi ashisayo ahambe wodwa, ama-teabag nobisi noshukela kwehlukane.
Kuxega amadolo endodeni uma sewumi phambi kwayo sewuyibuza ukuthi uyifakele izipuni ezingaki zikashukela, ithi uma seyiphuza lelo tiye kube sengathi iphuza wena uqobo.
MaSolezwe, ngicela ningizwisise uma ngithi indoda ayiyithandi into ehlanganisiwe, abantu besifazane kufanele baqonde ukuthi ayikho neyodwa indoda ethokoziswa ukubona umuntu wesimame egqoke wahlanganisa ithayithi nelegingi waze weleka ngejini.
Kuyajabulisa ukubona umuntu egqoke ilegingi yodwa noma agqoke ithayithi ihambe yodwa ingahlanganiswa nesiketi. Kwakhona nje ukugqoka isiketi esifushane nethayithi akujabulisi, kuba kubi kakhulu uma umuntu ezogqoka ingubo eshaya emaqakaleni ihambisane nethayithi.