UGigaba uzokwazi maduze ngekusasa lakhe
UNGQONGQOSHE wezaseKhaya, uMnuz Malusi Gigaba uzokwazi maduze ngekusasa lakhe emuva kokuthi uMengameli Cyril Ramaphosa ethe uzohlahla indlela eya phambilini maduze.
Lokhu kulandela umbiko woMvikeli woMphakathi, u-Adv Busisiwe Mkhwebane, othe uRamaphosa kufanele athathele izinyathelo uGigaba emuva kwezinsuku eziwu-14 ngokukhohlisa iPhalamende ngesivumelwano sakhe neFireblade Aviation.
U-Adv Mkhwebane uthole ukuthi uGigaba wakhohlisa iPhalamende wathi akayinikanga iFireblade imvume yokusebenzela e-OR Tambo International ekubeni imvume egunyaza le nkampani ukuba isebenzele laphaya yakhishwa wuye.
UMkhulumeli kaRamaphosa uNkk Khusela Diko uthe uRamaphosa uzofunda umbiko ka-Adv Mkhwebane bese ethatha isinqumo ngekusasa likaGigaba.
USihlalo wekomiti lokuziphatha ePhalamende, uMnuz Omie Singh, uthe bawutholile umbiko ka-Adv Mkhwebane futhi bazowudingida uma becelwa ukuthi benze lokho.
“Kufanele sikhumbule ukuthi umbiko uphume ngoLwesithathu.
“Okwamanje asikacelwa ukuthi siwudingide kodwa uma sicelwa ukuthi siwubheke sizokwenza lokho bese sithatha izinqumo ezifanele.,” kusho uSingh.
Amaqembu aphikisayo afuna uRamaphosa axoshe uGigaba njengoba ekhala ngokuthi akathembekile.
NgoLwesithathu iFireblade isamukelile isinqumo seNkantolo yoMthethosisekelo eyivune ukuba isebenzele e-OR Tambo ngoba sikhombisa ngokusobala ukuthi ikufanele ukusebenzela khona.