Amaphoyisa ehlise umthwalo kwabadala
ABOPHIKO lwamaphoyisa asombulula amacala ngokucwaninga izinsalela zeminwe nokunye endaweni yesigameko, banikelele isikhungo sabantu abadala eMlaza ngezimpahla zikaR1 million, izolo.
Abalolu phiko banomcimbi wokuklomelisa amaphoyisa ngaphansi kwalo enza kahle namhlanje, baqale ngokuvakashela isikhungo sabadala, uMlazi Christian Care Society belethe izipho, izolo.
Kukhona imibhede engu-50, izihlalo ezihamba ngamasondo ezingu-50, isitofu, osofa, izihlalo, ama-microwave, umshini ogaya amanabukeni alahlwayo. Umphathi walolu phiko KwaZulu-Natal, uBrigadier Nduduzo Bhengu uthe abalolu phiko bake bafika kulesi sikhungo bezogubha usuku lukaMandela, yilapho babona khona ukuthi lesi sikhungo sishoda ngezinto eziningi. “Ngazibophezela ukuthi ngizohamba ngicela ezinkampanini. Kuthe uma sithola ithuba lokuthi isifundazwe sethu kube yiso okuzokwenzelwa kuso umcimbi wokuchoma uphaphe amaphoyisa akulolu phiko enze kahle kulo nyaka, ngabona kuyithuba lokuthi ngazise zonke izifundazwe ngesifiso sami sokuphosa esivivaneni kulesi sikhungo. Lo mbono bawuthanda, sabe sesikwenza sonke njengengxenye yohlelo lwethu lokunikelela isikhungo esithile ngaphambi kokuthi siqale umcimbi. Lokhu sesizokwenza njalo,” kusho uBhengu.
UDkt Bongani Mkhize, imenenja yalesi sikhungo uthe bajabule kakhulu ngabakwenzelwe amaphoyisa. “Bese ngizame ngehluleka ukuthenga isitofu nomshini wokugaya amanabukeni alahlwayo ngoba kuyabiza. Lo mshini uzokwehlisa izindleko njengoba imfucuza yamanabukeni sizoyigaya thina, singeke sisaqasha inkampani elahla imfucuza yezempilo,” kusho uMkhize. UNkk Hawukeleni Mthembu (109) intombi endala ehlala kuso lesi sikhungo, ithe isilele kuwo umbhede ontofontofo.